Simeira Oseanu iha PNG Ramos-Horta defende konservasaun mariña
DILI, 14 Maiu 2026 (TATOLI)–Prezidente Repúblika, José Ramos-Horta, konklui ho susesu ninia Vizita Estadu istórika dahuluk ba Papua Nova Guiné (PNG) inklui partisipa Simeira Oseanu, nune’e defende maka’as kona-ba konservasaun mariña.
“Durante misaun vitál iha PNG, ha’u defende konservasaun mariña iha Simeira Oseanu Melanézia dahuluk (Inaugural Melanesian Oceans Summit). Hodi hametin interese kle’an ne’ebé fahe hamutuk hanesan nasaun Melanézia no Triángulu Korál nian,” Ramos-Horta hateten iha Aeroportu Internasionál Prezidente Nicolau Lobato, Komoro, hafoin fila husi PNG no Austrália, Kinta ne’e.
Notísia relevante : Charles Darwin University atribui Doutoramenru Honoris Causa ba Ramos-Horta
Nia dehan, durante iha PNG, konsege hala’o enkontru bilaterál istórika ho Primeiru-Ministru, James Marape no Governadór-Jerál, Bob Bofeng Dadae, hodi junta ho líder rejionál sira atu halo kompromisu ba meta biodiversidade globál 30×30 hodi proteje eransa azúl ne’ebé fahe hamutuk.
Ramos-Horta haktuir, ramata ninia programa ofisiál iha PNG iha Aeroportu Internasionál Jacksons, Prezidente simu despedida ne’ebé magnífiku no dignu.
Iha demonstrasaun loloos kona-ba fraternidade Pasífiku nian, líder a’as sira husi Papua Nova Guiné akompaña Prezidente Ramos-Horta ba sa’e aviaun no fó onra ho Guarda Onra ba despedida ofisiál.
Hodi subliña ospitalidade esesionál no respeitu mútuu entre ita-nia nasaun rua, Primeiru-Ministru Marape ho laran-luak fasilita aviaun privadu ida ba tránzitu Xefe Estadu nian ne’ebé lalais no seguru ba Austrália, jestu profundu ida ne’ebé Prezidénte apresia tebes.
Jornalista : Hortêncio Sanchez
Editora : Julia Chatarina
