DÍLI, 15 Maiu 2026 (TATOLI) – OXFAM enserra formasaun kona-ba Direitu ba Rai no Direitu Feto ba Rai ne’ebé hala’o durante loron tolu, husi 13 to’o 15 Maiu 2026, iha edifísiu OXFAM, Hudi-Laran, Díli.
Formasaun ne’e hetan partisipasaun husi jornalista nain-17 husi órgaun komunikasaun sosiál oioin, inklui Independente, Lafaek News, Hatutan News, DFM, Lolowari, TATOLI, TV Edukasaun, no Neon Metin.
Jestór OXFAM, Poe Ei Phgu, agradese fasilitadór no instituisaun media ne’ebé kolabora hodi haruka jornalista sira tuir formasaun referida.
“Hau agradese ba partisipante hotu ne’ebé tuir formasaun durante loron tolu. Ami hein katak koñesimentu ne’ebé hetan bele ajuda jornalista sira uza terminolojia jurídiku ne’ebé loos bainhira halo kobertura kona-ba disputa rai no propriedade iha Timor-Leste,” dehan Poe Ei Phgu.
Nia hateten tan katak formasaun ida-ne’e laos atividade ikus, maibé OXFAM sei kontinua haforsa koperasaun ho media no jornalista sira atu fó apoiu ba malu hodi promove kestaun sira kona-ba direitu ba rai no direitu feto ba rai.
Fasilitadór Tito Maia dos Reis husu ba jornalista sira atu aplika koñesimentu no terminolojia jurídiku ne’ebé aprende bainhira halo kobertura ba asuntu rai no propriedade.
“Saida mak imi aprende durante loron tolu ida labele para iha ne’e de’it. Imi presiza uza koñesimentu no terminolojia jurídiku sira atu haburas pensamentu kritiku no hakbiit kapasidade hakerek notísia kona-ba direitu no propriedade ba rai iha Timor-Leste,” nia dehan.
Jornalista: Camílio de Sousa
Editór: Filomeno Martins
