DILI, 19 Maiu 2026 (TATOLI)—Feto estudante na’in tolu kompostu husi Jesuína Correia Gama Ximenes (16), Adelina Dias Soares Marques (16) no Laura Reci-Bere (18) selesionada nu’udár Corpo Içar Bandeira Nacional (CIBN) iha seremónia Restaurasaun Independénsia ba da-XXIV, iha Tasi-Tolu, 20 Maiu 2026.
Jesuína Correia Gama Ximenes, estudante hosi Ensinu Sekundáriu Jerál 12 Novembru, sente kontente no orgullu sai Corpo Içar Bandeira Nacional (CIBN) ne’e.
Jesuína tama iha grupu CIBN liuhusi teste fízika no altura, altura feto tenke metru 1,67 no mane 1,72.
“Ha’u sente orgullu tebes tanba iha ha’u-nia moris foin primeiravez lori bandeira nasionál iha 20 Maiu 2026. Ida-ne’e hanesan hakat pasu ida oinsá iha mentalidade ne’ebé di’ak tanba ema barak no ema oioin, inklui ema importante sira-ne’ebé sei akompaña ami iha serimónia boot restaurasaun independénsia 20 Maiu 2026,” Jesuína Correia Gama Ximenes dehan ba TATOLI, iha Tasi-Tolu, Tersa ne’e.
Nia subliña durante treinu sempre iha dezafiu tanba foufoun treinu sei grogi no ta’uk, maibé kuandu treinu to’o semana ida, mai oin sente hanesan baibain ona.
“Atu mantein foku no konfiansa, tenke pratika mentalmente, konsentra ba espíritu nasionál no halo ezersísiu respirasaun, ida-ne’e mak ha’u halo,” nia haktuir.
Jesuína informa ida-ne’e hanesan esperiénsia ida ba estudante iha ekipa CIBN nian, espera eskola referida liuhusi Ministériu Edukasaun bele anota no fasilita ka apoiu estudu iha futuru.
Nune’e mós, Adelina Dias Soares Marques (16) hosi eskola São João Paulo espresa nia sente kontente no prosesu tama iha CIBN nian, dahuluk teste altura no marka pasu hodi instrutór sira observa mak foin hili sé mak sai ekipa prinsipál.
“Ha’u hakfodak no sente kontente tebes kuandu hili ha’u sai ekipa prinsipál tanba iha-ne’e maihosi eskola oioin. Ida-ne’e orgullu ida ba ha’u pesoál. Ha’u iha arriar nian (hatuun bandeira),” nia orgullu.
Adelina Soares akresenta iha treinu içar bandeira nasionál iha Tasi-Tolu, dezafiu prinsipál sira-ne’ebé sente mak ta’uk halo sala, ta’uk karik tali-nahan, bandeira nakfilak, ka la tenke tuir tempu (ritmu) koordenasaun múzika nian.
“Ha’u ta’uk tanba ema barak haree ka prezensa figura importante iha serimónia boot, maibé aleinde treinu iha formatura marsa, ami treinu mentalidade oinsá hasoru ema barak iha eventu boot hanesan ne’e,” nia esplika.
Aleinde ne’e, nia tenik, fatór seluk ida mak bainhira anin boot, ne’e difikulta tebes movimentu maibé maneira ida lori bandeira iha bandeza ne’e treinadu.
Entretantu, Laura Reci-Bere (18), nu’udár estudante Eskola Sekundária Jerál 04 Setembru UNAMET Balide hateten, dahuluk, ekipa selesaun husi CIBN sei bá eskola sekundária sira iha Dili laran, depoiz sira sei selesiona ema ne’ebé tama ba kritéria.
Nia dehan kada eskola foti estudande haat ka bele mós to’o na’in-sanulu (10), depende ba sira-ne’ebé tama iha kritéria hanesan altura no fízika.
“Ha’u sente orgullu tebes. Ida-ne’e responsabilidade boot, tanba bele hetan oportunidade ida-ne’ebé di’ak tebes, oportunidade ne’ebé ema barak mós iha mehi hakarak tama iha laran maibé agradese hili ha’u sai ekipa CIBN,” nia tenik.
Laura dehan maski nia hanesan ekipa formatura baibain maibé ida-ne’e sai orgullu boot, tanba ema barak mak hakarak sai CIBN.
“Ha’u prontu. Maski la’ós ha’u mak lori bandeira, ha’u sei partisipa iha serimónia ho disiplina no responsabilidade. Loron 20 Maiu hanesan loron nasionál boot, entaun importante atu hatudu unidade no respeitu ba nasaun. Hosi envolvimentu ne’e ha’u-nia esperansa mak bele sai sidadaun di’ak, ha’u mós espera bele hetan edukasaun di’ak atu futuru bele serve nasaun ho matenek,” nia tenik.
responsabilidade. Loron 20 Maiu hanesan loron nasionál boot, entaun importante atu hatudu unidade no respeitu ba nasaun. Hosi envolvimentu ne’e ha’u-nia esperansa mak bele sai sidadaun di’ak, ha’u mós espera bele hetan edukasaun di’ak atu futuru bele serve nasaun ho matenek,” nia tenik.
Jornalista: Osória Marques
Editór: Xisto Freitas da Piedade
