PPN atualiza progresu rekruta juiz Supremu Tribunál Justisa ba Xefe Estadu
DILI, 07 Janeiru 2026 (TATOLI)–Prezidente Parlamentu Nasionál (PPN), Maria Fernanda Lay, kuarta ne’e, atualiza progresu husi komisaun ne’ebé hili ona atu halo rekrutamentu ba Juiz Supremu Tribunál Justisa (STJ), ba Xefe Estadu José Ramos-Horta.
“Ha’u mai atu aprezenta kona-ba planu servisu 2026 nian no asuntu balun ne’ebé transversál entre Governu ho Prezidente Repúblika no Parlamentu Nasionál inklui komisaun ida kona-ba atu halo rekrutamentu ba juize ba Supremu Tribunál Justisa,” Fernanda Lay hateten ba jornalista sira hafoin ramata enkontru ho Xefe Estadu iha Prezidente Repúblika, José Ramos-Horta, iha Palásiu Prezidnsiál Nicolau Lobato, Bairru Pite, ohin.
Nia dehan, komisaun ne’ebé forma husi Parlamentu Nasionál ne’ebé nomeia ona ema na’in-rua (2) hodi haree asuntu ne’e mak Carmelita Moniz no José Pedro Camoês, maibé sei iha dezafiu lubuk ida.
“Dezafiu balun ne’ebé ita enfrenta ligadu ho asuntu ne’e ho Governu ligadu mós ho reforma justisa. Ne’ebé, prosesu la’o hela, ita hein katak tuir desezu Prezidente Repúblika katak ita tenke estabelese Supremu Tribunál Justisa atu fó justisa ba ema hotu no Juiz atu halo julgamentu la’ós ema ida de’it, no justisa ba povu kiik sira ho dignu,” nia dehan.
Nia hatutan, atu estabelese STJ tenke aselera lalais atu nune’e, antes termina tinan 2026 tenke finaliza prosesu hotu no Timor-Leste bele iha ona STJ.
“Ida-ne’e ita foin mak hahú ne’ebé ami-nian reprejentante rua (2) no Prezidente Repúblika nian iha ida (1) mak Abelino Colho mak sei dirije komisaun ne’e.
Espera katak sira iha reuniaun iha inisiu hodi haree sira nia planu no fatin hodi halo servisu, buat hotu la’o hela,” nia dehan.
Komisaun ne’ebé iha ona só bele halo de’it selesaun no rekruta de’it asesor internasionál ida (1) atu halo selesaun ba Juiz sira-ne’ebé ho kriteria tenke prienxe tuir lei ne’ebé iha.
Jornalista : Hortencio Sanchez
Editór : Cancio Ximenes
