DILI, 09 Janeiru 2026 (TATOLI) – Diresaun Nasionál Transporte Terrestre (DNTT) distribui ona xapa matríkula orijinál ba kondutór no motorista sira.
Xefe Departamentu Sekretariadu Apoiu Tékniku Administrasaun DNTT, Nelson Sequeira, hateten xapa matríkula sira ne’e tama iha Dezembru 2025 nia rohan no komesa distribui iha 05 Janeiru 2026.
“Husu ba públiku ne’ebé sei uza hela xapa matríkula provizóriu bele mai foti ona ita-boot sira-nia xapa matríkula, tanba iha tempu badak ita sei koordena ho Polísia halo pasa revista ba xapa matríkula. Bainhira imi la foti maka sei fó infrasaun ba imi”, Nedlson Sequeira dehan ba Tatoli iha DNTT, Balide, Dili.
DNTT halo akizisaun ba xapa matríkula hamutuk 69.009 ho totál orsamentu $704.615.
Aleinde ne’e, DNTT mós daudaun distribui blanku ba livrete no karta kondusaun hahú husi munisípiu Dili. “Blanku livrete no karta kondusaun ita sosa hamutuk rihun 80-resin ho totál orsamentu rihun $185”, dehan.
Iha fatin hanesan kondutór, Miguel Mileno Bianco da Silva, hateten nia uza xapa matríkula provizóriu kuaze tinan ida, maibé agora hetan ona orijinál.
“Ami mós rekomenda ba Governu karik bale haree no kria kondisaun ne’ebé di’ak ba DNTT, nune’e bainhira ita mai trata dokumentu bele iha fatin ne’ebé dignu hodi atende públiku”, nia sujere.
Hatán kestaun ne’e, Xefe Departamentu Nelson Sequeira hateten sira-nia parte esforsu no haree hotu ba situasaun sira ne’e, maibé buat hotu bazeia ba orsamentu ne’ebé aloka ba diresaun ne’e.
Notísia relevante: DNTT distribui xapa matríkula orijinál ba karreta-motór iha Janeiru 2026
Jornalista: Arminda Fonseca
Editora: Maria Auxiliadora
