DILI, 08 Janeiru 2026 (TATOLI)—Autoridade Suku Buruma, Postu Administrativu Baukau Vila kontinua prioriza infraestrutura bázika liuliu estrada iha tinan 2026.
Xefe Suku Buruma, Libório dos Santos Freitas hato’o razaun kontinua fó prioridade ba estrada tanba hakarak fasilita konetividade ba área turizmu, uma-lisan no fatin produsaun iha aldeia rua hanesan Tasi no Wonosere.
“Tinan-ne’e ita kontinua foku ba estrada hodi halo koneksaun ba área vitál sira,” Xefe Suku Buruma informa ba TATOLI liuhosi telefónema, Kuarta ne’e.
Libório relata estrada ne’ebé planeia atu implementa iha tinan-ne’e sei halo konesaun husi estrada públika ba uma-lisan rua iha Aldeia Tasi no kontinua konstrui estrada iha área Wonosere ne’ebé sei liga bá fatin turizmu inklui semitériu públiku ho totál distánsia kilómetru ida resin husi Suku Buruma.
Aleinde ne’e, Autoridade Suku Buruma sei kontinua promove setór turizmu komunitáriu no agrukultura ligadu ho pekúaria no peskas nune’e tuir planu sei koordena ho membru konsellu suku hodi deside liuhusi reuniaun konsellu suku.
“Ami sei utiliza orsamentu husi Programa Nasionál Dezenvolvimentu Suku (PNDS) tanba ida-ne’e mak sai fonte finanseira ba suku,” Libório akresenta.
Entertantu, Suku Buruma hamutuk aldeia haat kompostu husi Aldeia Tasi, Suli-Ua, Kasamutu no Ono-Sere ho totál populasaun hamutuk 3.245.
Jornalista: Natalino Belo
Editór: Xisto Freitas da Piedade
