DILI, 09 Janeiru 2026 (TATOLI) – Governu Kamboja nian fó-sai katak kaer no estradita ona bá Xina magnata ida ne’ebé akuzadu hala’o eskema jogu online ne’ebé boot.
Ministériu Negósiu Estranjeiru Xinés deskreve kapturasaun ba Prezidente Grupu Prince Holding Chen Zhi iha Kamboja, ne’ebé tuirmai lori ba Xina, hanesan demonstrasaun ida hosi sira-nia responsabilidade hamutuk hodi halakon jogu online.
“Durante tempu balun, Xina koopera ho ativu ho nasaun sira, inklui Kamboja, hodi hapara jogu online no fraude telekomunikasaun nian, ho rezultadu signifikativu sira. Halakon jogu online no fraude telekomunikasaun nian hanesan responsabilidade kompartida hosi komunidade internasionál,” hatete hosi porta-vós hosi Ministériu Negósiu Estranjeiru xinés, Mao Ning, iha konferénsia imprensa ida, iha loron-kinta ne’e.
Ministériu Internu Kamboja nian hatete katak Prezidente Prince Holding Group Chen Zhi (38) no sidadaun xinés na’in-rua seluk hetan kaer no estradita iha loron-tersa, 06 Janeiru tuir pedidu hosi autoridade xineza sira.
Transmisaun sira televizaun xinés nian deskreve Chen hanesan “líder hosi sindikatu boot ida hosi jogu no fraude transnasionál sira.”
Chen, ne’ebé moris iha Xina tanba ne’e hanesan sidadaun xinés maibé antes ne’e iha sidadania Kamboja nian, maske hafoin ne’e revoga ona, hasoru akuzasaun sira hosi Estadu Unida Amérika no Reinu Unidu tanba akuzasaun oioin relasionadu ho fraude no brankeamentu kapitál.
“Xina prontu atu serbisu ho nasaun viziñu sira, inklui Kamboja, hodi hasa’e kooperasaun hosi aplikasaun lei nian, proteje seguransa hosi ema-nia vida no propriedade, no salvaguarda troka sira no kooperasaun entre nasaun sira iha rejiaun,” Mao Ning hatete.
Prokuradór norte-amerikanu sira akuza Chen ho hanoin kona-ba eskema fraude sibernétiku multinasionál, uza nia negósiu sira seluk ba brankeamentu kapitál no abuza traballadór sira.
Autoridade norte-amerikanu sira mós prende Chen nia rikusoin sira, inklui propriedade sira ho folin pelumenus dolar amerikanu millaun 100 no dolar amerikanu millaun rihun 14 iha kriptomoeda.
Chen hetan akuzasaun tanba halo fraude ba ema amerikanu na’in-250 hosi dolar millaun-resin, ho vítima ida lakon dolar amerikanu rihun $400 iha kriptomoeda.
Prince Group hatete katak hala’o negósiu liu 100 iha nasaun 30, ho rede ida hosi sentru sira fraude nian liuliu iha Kamboja no Miánmar, ne’ebé maka halo fraude ba vítima barak iha nasaun oioin.
Entretantu, autoridade britániku sira konjela Chen nia negósiu no ativu sira iha Reinu Unidu, inklui uma luxu ida ho folin euro millaun 12 no edifísiu eskritóriu ida ho folin euro millaun 100 iha Londres.
Singapura lansa de’it investigasaun ida iha loron 30 fulan-Outubru, hodi fó-sai kona-ba apreensaun ba patrimóniu finanseiru sira Chen nian ho folin liu dolar Singapura millaun 150 (dolar amerikanu millaun $114) no iate ida.
Iha Taiwan, polísia apreende karreta luxu hamutuk 26, inklui Ferrari ida, Bugatti ida, no Porsche ida, enkuantu polísia Hong Kong apreende ativu finanseiru sira. Autoridade tolu ne’e agora daudaun investiga hela Chen.
Maibé, seidauk klaru akuzasaun saida maka Chen hasoru. Mídia lokál Xinés identifika ona Chen Zhi hanesan mestre iha rede fraude online transnasionál boot liu nia kotuk.
Grupu kriminozu ne’ebé nia lidera uza negósiu lejítimu sira hanesan frente, hala’o eskema fraude oioin, hanesan “sha zhu pan” (eskrotu domin/investimentu nian), hodi lohi vítima sira ne’ebé la deskonfia hodi entrega sira-nia osan, ne’ebé hafoin ne’e transfere uza kriptomoeda.
Chen Zi tuir informasaun moris iha tinan 1987 iha aldeia peskadór ki’ik ida iha Provínsia Fujian no husik eskola sekundária hodi halo migrasaun.
Nia harii empreza jogu online ida no na’ok servidór jogu ilegál sira.
Iha 2010, Chen Zhi halai ba Kamboja ho osan ne’ebé nia hetan hosi nia krime sira, hodi asume identidade hanesan “dezenvolvedor propriedade nian”. Hafoin ne’e nia hetan sidadania Kamboja nian iha 2014.
Iha 2015, Chen harii Prince Group, ne’ebé foka ba dezenvolvimentu propriedade nian, depois Prince Bank, no iha 2020, harii mós kompañia aérea ida iha Kamboja.
Desde 2017, Chen Zhi serbisu hanesan asesór ba ministru oioin no mós ba primeiru-ministru. Mídia Kamboja deskreve ona Chen Zhi hanesan “filantropu jenerozu ida.”
Prince Group antes nega ona envolvimentu iha fraude no reklama katak hakotu ona ligasaun sira ho rede fraudulentu online sira.
Relatóriu sira hosi mídia indika katak iha tinan 2025, Prince Group kontrola ona fatin ilegál liu 10 iha Kamboja. Fatin rua de’it maka iha “to’os telemóvel nian” ho telemóvel 1,250 no opera konta falsu liu 76,000 iha mídia sosiál hodi bosok ema.
