DILI, 13 Janeiru 2026 (TATOLI)–Ministru Ensinu Superiór, Siénsia no Kultura, José Honório da Costa Pereira Jerónimo konsidera muda Universidade Nasionál Timor Lorosa’e (UNTL) bá Hera, ida-ne’e la fásil tanba tenke iha dezeñu no mós orsamentu.
“Ha’u hanoin ita-boot sira akompaña iha Parlamentu Nasionál, deputadu sira husu atu muda edifísiu UNTL sentrál bá Hera, maibé ha’u hatete ida-ne’e la fásil, tanba dahuluk ita tenke halo dezeñu. Daruak, ita mós tenke tau orsamentu no tenke iha aprovasaun husi Komisaun Revizaun Orsamentu (KRO), depoiz haruka ba fundu infraestrutura,” nia dehan ba jornalista sira iha nia kna’ar fatin, Kolmera, Tersa ne’e.
José Honório tenik atu mellora di’ak liután UNTL, presiza haree liubá infraestrutura, saladeaula no mós profesór sira, nune’e estudante sira bele simu matéria ho di’ak.
Antes ne’e, Bankada Partidu Kmanek Haburas Unidade Nasionál Timor-Oan husu ba Ministériu Ensinu Superiór, Siénsia no Kultura atu muda Universidade Nasionál Timor Lorosa’e bá Hera. Razaun prinsipál, tanba ezisténsia kampus ne’ebé besik ho Parlamentu Nasionál (PN) iha-ne’ebé dalabarak perturba atividade lejizlasaun.
“Ha’u husu dala ida tan ba ita-boot, se bele karik universidade UNTL ne’e, ita-nia oin daudaun ne’e, muda ba Hera ne’ebá. Muda sai tiha. Labele besik mai Parlamentu Nasionál nune’e ita-boot kontrola bele. Se lae mak ita kontrola labele,” Deputada Olinda Guterres informa.
Jornalista: Osória Marques
Editór: Xisto Freitas da Piedade
