VIKEKE, 05 Janeiru 2026 (TATOLI)—Xefe Suku Uma-Tolu, Postu Administrativu Lakluta, Munisípiu Vikeke, Eduardo Soares, solisita Governu liuhusi Ministériu Obra Públika (MOP) konstrui ponte Sumaku ne’ebé kotuk kle’ur ona tanba iha tempu udan sempre difikulta populasaun nia movimentu.
“Ponte Sumaku kotuk tinan naruk ona. Nune’e, iha tempu udan mota tun ita haree difikulta tebes ita-nia komunidade ne’ebé hala’o movimentu. Dalabarak karreta sira liu mota tenke liuhusi mota laran, karreta sira-ne’ebé laih trasaun liu difisil. Tanba ne’e, ha’u hakarak husu MOP konstrui ponte atu fasilita ita-nia populasaun nia movimentu,” Eduardo Soares ba TATOLI iha Postu Vikeke Vila, Segunda ne’e.
Autoridade lokál ne’e haktuir daudaun ne’e bainhira mota tun, komunidade tenke halo tranzasaun sasán husi mota sorin mak tula ba karreta no aleinde ne’e kuandu transporta moras emerjénsia ruma iha tempu udan, labele liu, tenke hein to’o mota maran hafoin liu.
Eduardo informa katak ponte Sumaku ne’e la tama iha pakote reabilitasaun estrada husi Raihun Luka to’o Postu Lakluta hamutuk kilómetru 14.
“Foin lalais ha’u konfirma tékniku sira husi MOP nasionál ba ponte Sumaku nian, maibé sira dehan ponte ne’e la tama iha pakote reabilitasaun estrada ne’ebé agora daudaun la’o ne’e no ponte ne’e sei liuhusi konkursu ketak,” nia konta.
Kona-ba preokupasaun ponte ne’e, Eduardo tenik, nia parte relata beibeik ona ba Servisu Obra Públika Munisípiu Vikeke no MOP nasionál, maibé to’o agora seidauk iha resposta ruma ba asuntu ne’e.
Iha fatin ketak, Xefe Sentru Saúde Lakluta, Bendito Soares haktuir, ponte Sumaku durante ne’e difikulta servisu saúde liuliu ba transferénsia moras ba ospitál Internamentu Munisípiu Vikeke.
“Durante ne’e ami preokupa tebes ba ponte Sumaku ne’ebé kotu. Kuandu la udan ami bele liu husi mota laran, maibé kuandu udan mota boot tun, ami-nia ambulánsia labele liu, tenke hein mota menus foin liu. Ida-ne’e sai dezafiu ba ami. Tanba ne’e, Governu presiza tau-matan lalais hodi rezolve,” nia subliña.
Hatán ba preokupasaun ne’e, Diretór Servisu Obra Públika Munisípiu Vikeke, Casildo Gomes hateten, ponte Sumaku pakote ketak ne’ebé daudaun ne’e sei iha prosesu nia laran.
“Ponte Sumaku la hamutuk ho pakotu reabilitasaun estrada. Ne’ebé, iha ona prosesu. Bainhira prosesu sira konkluidu lalais ita sei implementa iha tinan ida-ne’e,” nia hato’o.
Fó hanoin fali katak ponte Sumaku kotu dahuluk iha tinan 2019, tuir mai iha tinan 2021, 2023 no agora iha tinan ne’e kotu tan.
Tuir dadus, Postu Lakluta kompostu husi suku haat hanesan Uma-Tolu, Dilór, Ahic no Laline, ho totál abitante 8.123 husi uma-kain 1.907.
Jornalista: Vitorino Lopes da Costa
Editór: Xisto Freitas da Piedade
