VIKEKE, 11 Juñu 2026 (TATOLI)—Selebrasaun loron Santo António Polísia Nasionál Timor-Leste (PNTL) Munisípiu Vikeke sei relaiza jogu desportu hodi kria amizade entre komunidade iha Munisípiu Vikeke.
Komandante Polísia Nasionál Timor-Leste (PNTL) Munisípiu Vikeke, Superintendente Xefe Polísia, Euclides Belo, haktuir objetivu jogu ne’e hodi hametin unidade entre seguransa no entidade sira iha Munisípiu Vikeke.
“Selebrasaun loron Santo António ne’ebé sei monu iha loron 13 fulan Juñun e’ebé sai mós mahein ba PNTL Munisípiu Vikeke. Nune’e, ba selebrasaun ne’e ami inisiativa hakarak realiza jogu desportu amizade ho ita-nia instiusaun sira no komunidade hodi kria fraternidade umane,”
Euclides Belo hateten ba jornalista sira iha Beskem, Kinta ne’e.
Komandante ne’e dehan programa selebrasaun loron santo António Komandu PNTL Munisípiu Vikeke fó ona orientasaun ba Xefe Seksaun Polisiamentu Komunitáriu hodi organiza atividade sira.
“Atividade ne’e ami sei realiza mak hanesan jogu voliból, futeból no futsál entre instituisaun sira iha Munisípiu Vikeke. Nune’e, oras-ne’e ami prepara hela mekanizmu jogu nian. Liuhusi eventu sira-ne’e ita bele hametin kooperasaun entre komandu munisípiu, autoridade lokál no komunidade iha Vikeke,” nia esplika.
Nia hatutan preparasaun seluk ne’ebé PNTL prepara mak hadi’a kampu futeból, voliból no hadi’a bandeira nian ai-riin.
Euclides informa PNTL mós sei koordena ho Konsellu Kombatente Libertasaun Nasionál (CCLN-sigla portugeza) bá vizita fatin istóriku Uasadiga. Atividade sira-ne’e sei realiza iha loron-Sábadu (13/06) mai ne’e.
Jornalista: Vitorino Lopes da Costa
Editór: Xisto Freitas da Piedade
