DILI, 03 Jullu 2026 (TATOLI)–Diretór Ezekutivu Servisu Migrasaun, Komisáriu Asistente Polísia Jorge Monteiro, klarifika katak, sidadaun Indonézia na’in-tolu ho inisiál S, L no RS ne’ebé tama no aterra ho Jet Privadu iha Aeroportu Internasionál Nicolau Lobato, Komoro, ne’e mai ho dokumentu legál.
“Ema na’in-tolu mai iha ita-nia rai ne’e sira-nia atividade atu halo saida-saida la’ós papél Servisu Imigrasaun. Buat ne’ebé ha’u hakarak hateten katak, ema na’in-tolu ne’ebé tama mai iha territóriu nasionál ho legalmente tanba sira priense dokumentu no rekezitu sira ne’ebé ke neseita antes tama iha territóriu nasionál Timor-Leste,” Jorge Monteiro informa ba jornalista sira iha ninia knaar fatin, Ministeriu Interiór, Vila-Verde sesta ne’e.
Nia dehan, Ekipa Servisu Migrasaun haree ba tama no sai sidadaun nasionál no internasionál iha territóriu Timor-Leste.
“Ita-nia papél ne’e atu garante katak ema sidadaun internasionál ou sidadaun Timor-Leste ne’ebé ke sai husi territóriu nasionál Timor-Leste ne’e priense rekezitu nomós tuir prosedimentu ne’ebé ke legál hodi bele sai iha li’ur no tama filafali,” nia akresenta.
Nia hatutan, kona-ba atu kontrola sidadaun na’in-tolu nia atividade durante estadia iha Timor-Leste ne’e instituisaun seluk nia kompeténsia.
“Sira-nia atividade ne’e la’ós ona Servisu Migrasaun nia kompétensia. Ita-nia kompétensia atu define katak sira-nia entrada mai iha territóriu nasionál tuir lei no regulamentu ne’ebé ke iha ka lae? sira-nia dokumentu ne’ebé neseita kompleta ka lae,” nia akresenta.
Notísia relevante : Aero Dili alarga vou nível internasionál iha janeiru 2023
Hatán kona-ba tanba sá mak Servisu Imigrasaun autoriza sidadaun hirak ne’e bá fali sira-nia nasaun orijen Indonézia, Jorge Monteiro hateten, instituisaun hala’o de’it nia knaar.
“Relasiona ho aviaun komersiál atu tama, ema ho Aviaun Privadu atu tama hodi tula ema ne’e la kabe ba kompoténsia Servisu Migrasaun,” nia katak.
Diretór ne’e esplika, sidadaun na’in-tolu tama mai Dili iha loron 29 Juñu 2026 no sai ne’e tuir prosesu legál.
“Sira priense prosesu no prosedimentu ne’ebé ke iha hodi sai husi ita-nia territóriu nasionál Timor-Leste,” nia reforsa.
Komisáriu Asistente Polísia ne’e la hatene sidadaun estranjeiru naa’in-tolu nia objetivu mai Timor-Leste.
“Ita-nia Lei Azilu Migrasaun ne’e define kompeténsia sira-ne’ebé kabe ba Servisu Sigrasaun. Ami mak haree ba aspeitu kona-ba sidadaun ruma husi nasaun seluk ruma tama iha territóriu nasionál Timor-Leste,” nia hato’o.
Sidadaun Indonézia na’in-tolu tama mai Dili iha Segunda (29/06) ho Jet Privadu ida ho tipu Cessna Citation 700. Iha loron Kuarta (01/07) aviaun ne’e semo husi Aeroportu Soekarno Hatta Banten no konsege aterra iha Aeroportu Internasionál Prezidente Nicolau Lobato, Komoro iha tuku 17:00 atu lori fila sidadaun Indonézia na’in-tolu ne’e bá fali sira-nia nasaun orijen.
Hafoin Jet Privadu ne’e aterra lakonsege tula sidadaun na’in-tolu tanba komunidade intijénsia, Autoridade Seguransa, Servisu Migrasaun no parte Ofisiál Aeroportu la autoriza tula sidadaun na’in-tolu ne’e tanba autoridade sira deteta katak aviaun ne’e nia dokumentu balun iha problema.
Nune’e, Jet Privadu ne’e para de’it iha Aeroportu Komoro desde Kuarta (01/07) hodi submete ba prosesu investigasaun.
Enkuantu, sidadaun estranjeiru na’in-tolu iha loron Kinta (02/7) maizumenus tuku 09:00 dadeer sa’e aviaun komersiál Aero Dili hodi kontinua halo sira-nia viajen bá nasaun orijen Indonézia tanba hetan ona autorizaun husi Servisu Migrasaun.
Jet Privadu ne’e iha loron Kinta (02/07) pur volta tuku 16:00 lorokraik semo fali bá Indonézia.
To’o notísia ne’e publika, Jornalist Ajénsia TATOLI seidauk hetan deklarasaun ruma husi parte PNTL, Autoridade Aeroportu no entidade relevamnte seluk.
Jornalista : Natalino Costa
Editora : Julia Chatarina
