DILI, 14 Juñu 2026 (TATOLI)–Jogadór Vinicius Jr. sai eroi hodi salva nia nasaun (Brazíl) husi derrota bainhira marka golu iha minutu 33, iha jogu Kopa Mundiál FIFA 2026 bainhira kontra adversáriu Maroko ne’ebé realiza iha Estádiu MetLife/New York, Domingu ne’e.
Salvasaun ne’e jogadór fitun Real Madrid halo bainhira nia fura rede Maroco iha minutu 33, iha ámbitu Maroko lidera hela jogu 1-0. Golu Vinicius muda rezultadu ba impata.
Bainhira jogu hahú ne’ebé lidera husi árbitru hosi nasaun Slovenia, Slavko Vincic hú apitu, jogadór sira iha kampu matak nia leten lansa kedan kontra-atake ba malu tuir tékniku no abilidade ne’ebé iha oinsá atu prodús golu.
Brazíl lansa atake ne’ebé maka’as ba Maroko maibé atake hirak-ne’e sei hela de’it haneaan atake basá Maroko nia defeza metin tebes. Susar fó fatin atu Brazíl tama tuir nia hakarak, maibé tenke liuhusi luta naruk.
Hafoin falta oportunidade sira-ne’ebé signifikativa iha minutu 20 dahuluk, Maroko hetan surpreza ida. Maroko hetan vantajen liuhosi Ismael Saibari konsege fura ona rede Brazíl.
Golu ne’e mosu husi jogu atake simples. Brahim Diaz nia bola liuhosi meiu-kampu permite Saibari halai sees hosi defeza brazileiru sira.
Gabriel Magalhães, ne’ebé mak iha kna’ar atu marka nian, labele kaer Saibari. Haree Alisson avansa hodi taka lakuna, Saibari lansa xuta ida-ne’ebé maka’as ba rede.
Hafoin konsede, Brazíl la konsege halai sees hosi presaun no ameasa atu halo kontra. Maroko, iha parte seluk, Maroko kontinua halo jogu nakloke no fó presaun ba defeza brazileiru.
Brahim Diaz lansa xutu ida iha minutu 29, maibé nia xuta fraku liu, tan ne’e fasilmente salva husi Alisson. La rezulta golu. Ekipa samba ne’e nakdoko iha ema rihun ba rihun nia oin.
Hafoin la konsege halo xutu ba alvu iha minutu 30 dahuluk, fó kedan oportunidade ba Brazil, ikusmai halo impata iha minutu 33. Golu impata ne’e lansa husi jogadór Real Madrid Vinicius Jr, ne’ebé utiliza nia matenek rasik.
Golu ne’ebé Vinicius marka bainhira simu bola husi Bruno Guimarães, Vinicius marka besik husi jogadór marrokinu sira. Maski nune’e, Vinicius konsege hakat liu jogadór ida no xutu ba kantu loos baliza nian.
Husi golu ne’e, Brazíl nia jogu sai animadu liután. Iha tempu lezaun nian, Lucas Paqueta ezekuta remate akrobátiku ida, maibé bola salva husi Bono. Husi prosesu hirak-ne’e hotu la rezulta tan golu to’o minutu primeira parte nian termina ho 1-1.
Tama ba segunda parte, Brazíl halo atake ne’ebé maka’as oinsá atu muda rezultadu golu, maibé Maroko la fó fatin liuhusi nia defeza ne’ebé metin hanesan morru berlin.
Maroko reziste ho kalma, maski hetan presaun maka’as husi Brazíl ne’ebé akomula jogadór fitun hanesan Raphyna no Vinicius Jr.
Maroko hala’o jogu ho kalma, pasa bola hosi ain ba ain, maibé Brazíl la fó fatin nafatin. Iha minutu 75, jogadór Brazíl, Raphyna simu bola pasa ho kalma husu Vinicius xutu ho nia ain karuk maibé la konsege tama bá rede Maroko tanba salva husi guarda-rede.
Jogu la’o to’o minutu 90, aumenta tan adisionál minutu 10, fó tempu ba nasaun rua bele aumenta golu hodi fó vitória ba sira-nia nasaun, infelizmente to’o minutu adisionál termina jogu laiha mudansa. Rezultadu mantein 1-1.
Hosi rezultadu ne’e, nasaun rua tenke fahe pontu ida-ida ba malu iha grupu C. Iha jogu tuirmai nasaun rua tenke luta maka’as nune’e bele aumenta pontu hodi ultrapasa ba jogu oitavu finál.
Brazíl (4-2-3-1)
(1) A. Becker, (2) Roger Ibanez, (4) Marquinhos, (3) Gabriel, (16) Douglas Santos, (5) Casemiro, (8) B. Guimaraes, (11) Raphinha, (20) Lucas Paqueta, (7) V. Júnior, (25) Igor Thiago.
Maroco (4-2-3-1)
(11) Ismael Saibari, (23) B. El Khannouss, (8) Azzedine Ounahi, (10) Brahim Diaz, (24) Neil El Aynaoui, (6) Ayyoub Bouaddi, (3) Noussair Mazraoui, (18) C. Riad, (14) ssa Diop, (2) A. Hakimi, (1) Bono.
Jornalista: Hortêncio Sanchez
Editór: Xisto Freitas da Piedade
