DÍLI, 01 Jullu 2026 (TATOLI) – Ministru Transporte no Komunikasaun, Miguel Gonçalves Manetelu, deklara progresu instalasaun fibra ótika prontu ona no hein lansamentu komersiál ba públiku fulan ne’e.
Ministru Transportes no Komunikasoins, Miguel Marques Gonçalves Manetelu hatoo deklarasaun ne’e hafoin halo aprezentasaun kona-ba progresu ne’ebé alkansa ona iha implementasaun Sistema Kabu Submarinu Súl Timor-Leste (TLSSC-Sigla Inglés) no rede fibra ótika terrestre nasionál.
Nia dehan tuir planu, lansamentu komersiál ne’e posibilidade sei bele realiza entre loron 20 to’o 30 fulan-ne’e depende ba disponibilidade Primeiru Ministru Xanana Gusmão nian.
Nia haktuir katak durante enkontru, governante balun sujere atu marka ajenda lansamentu ne’e ba iha loron nasionál sira hanesan 30 Agostu, maibé “ha’u hateten dehan ne’e kleur liu.”
Iha ninia parezentasaun, Ministru Manetelu relata kona-ba finalizasaun instalasaun no teste ba fiu submarinu internasionál, ne’ebé deklara tiha ona prontu ba operasaun komersiál, nune’e mós kriasaun empreza públika Cabos de Timor-Leste, EP, ne’ebé responsavel ba jestaun infraestrutura estratéjika ne’e no progresus ne’ebé hetan ona iha nia operasionalizasaun.
Governante ne’e mós aprezenta kona-ba asaun prinsipál sira ne’ebé hala’o daudaun ka programadu (programa ona), inklui preparasaun ba inísiu operasaun komersiál, reforsa kapasidade operasionál empreza nian, aumentu redundánsia ligasaun internasionál, hametin siberseguransa, no mós expansaun rede fibra ótika nasionál, ho objetivu atu hametin konektividade dijitál nasionál no impulsiona ekonomia dijitál.
Jornalista: Alexandra da Costa
Editór: Filomeno Martins
