BOBONARU, 15 Juñu 2026 (TATOLI) – Inan-aman estudante apoia Ministériu Edukasaun (ME) hodi kontribui ba halo reabilitasaun saladeaula tolu iha Eskola Bázika Sentrál (EBC, sigla portugés) iha suku Tapo, postu administrativu Bobonaru, munisípiu Bobonaru, ne’ebé hetan danus husi anin-boot akontese foin lalais ne’e.
Diretór EBC Tapo, Casemiro Pinto, relata katak ministériu disponibiliza zinku tahan 200, besi-baja, no pregu. Enkuantu, materiál balun kontribui liuhusi fundu ne’ebé inan-aman alunu fó bazeia ba desizaun ne’ebé sira halo.
“Prosesu ne’e naruk, tanba kestaun ida mak materiál ne’e rasik atu reabilita ho kualidade, tanba baja ida mai ne’e ho kanál (C), entaun sira-nia reprezentante (inan-aman) dehan ita halo la to’o fulan ida ka rua anin mai sobu fali, ne’e mak presiza kontribuisaun fundu balun husi inan-aman”, nia informa ba Tatoli iha Tapo, segunda-feira ne’e.
Dirijente ne’e afirma katak serbisu fíziku hahú domingu ne’e no tuir planu sei finaliza iha semana ne’e.
Nia subliña katak tuir loloos reabilitasaun ne’e ba saladeaula tolu, maibé parte hotu konkorda no deside hodi muda no reabilita fali sala tolu ne’ebé iha tinan 2017 konstrui husi FALINTIL-Forsa Defeza Timor-Leste (F-FDTL).
“Muda mai leten tanba eskola ida kraik ne’e rai-halai no aat hotu ona. Sala rua konstrui ho osan PNDS ne’e labele halo tanba materaiál emerjénsia no kontribuisaun ne’e responde de’it ba sala tolu nian”, nia realsa.
Tuir planu, bainhira reabilitasaun ne’e konklui, parte eskola sei akumula estudante ensinu báziku primeiru, segundu no terseiru siklu iha fatin referida fahe ba turnu rua.
“Turnu dadeer ba terseiru siklu, loraik ba primeiru no segundu siklu. Loloos primeiru ho segundu siklu mak turnu dadeer, maibé tanba kestaun distánsia, entaun ita tetu ba tetu hakarak ka lakohi terseiru siklu mak dadeer, razaun sira balun mai husi suku Leber no Oe-eleu, primeiru ho segundu siklu ne’e sira iha Tapo laran de’it”, dehan.
EBC Tapo iha saladeaula 17 no iha estudante hamutuk 309 no manorin 17. EBC ne’e akumula mós estudante Ensinu Báziku terseiru siklu husi suku Leber no Oe-leu.
Jornalista: Sergio da Cruz
Editora: Maria Auxiliadora
