DILI, 25 Juñu 2026 (TATOLI)–Supremu Tribunál Justisa (STJ) Portugál reafirma prontidaun atu kontinua apoia reforma seitór justisa, liuliu iha área formasaun rekursu umanu, fortalesimentu instituisaun no partilla esperiénsia judisiária hodi kontribui ba konsolidasaun Estadu Direitu Demokrátiku iha Timor-Leste.
Sentidu prontidaun ne’e hato’o direta husi Prezidente Supremu Tribunál Justisa Portugal, João Cura Mariano, durante enkontru ho Primeiru-Ministru Timor-Leste, Kay Rala Xanana Gusmão, hodi diskute kona-ba fortalesimentu kooperasaun bilaterál iha área sistema justisa iha Timor-Leste.
Nune’e iha enkontru ne’e parte rua fó énfaze ba ba malu liuliu nesesidade ne’ebé atu investe mak iha formasaun no kapasitasaun profisionál bá juíz sira, prokurador sira, defensór públiku sira no operadór judisiáriu sira, hodi hasa’e kualidade servisu judisiáriu no responde ba dezafiu sira-ne’ebé seitór justisa Timor-Leste sei hasoru atualmente.
Primeiru-Ministru, Kay Rala Xanana Gusmão, hateten iha kooperasaun ne’e inklui ona diskusaun ho Ministru Justisa Timor-Leste, Sérgio da Costa Hornai, no Koordenadora Grupu Traballu Reforma Justisa Timor-Leste nian, Lúcia Lobato.
“Objetivu prinsipál mak prepara rekursu umanu forte ba médiu prazu, liuliu tinan lima oin, hodi prepara jurista no operadór justisa Timor-Leste nian iha ne’ebé Governu haruka ona timoroan na’in-50-resin mai estuda Direitu iha universidade sira iha Portugal, hanesan parte husi estratéjia reforma justisa,” Xefe Governu hateten durante enkontru iha Lisboa Portugál.
PM Xanana mós fó énfaze katak sistema justisa tenke adapta ba realidade lokál, tanba kada país iha nia realidade espesífika tanba iha kazu balun juiz sira enfrenta difikuldade relasiona ho língua no konteúdu jurídiku, nune’e nesesita apoiu formasaun no asisténsia téknika husi Portugál.
“Prezidente Supremu Tribunál Justisa Portugál demonstra komprensaun kle’an bá situasaun Timor-Leste nian no promete kontinua apoia reforma setór justisa, liuhusi asesória, formasaun no partilla boa-prátika judisiária. Justisa mak baze bá pás, progresu no estabilidade nasaun ida nian,” Líder polítiku ne’e afirma.
Ministru Justisa, Sérgio da Costa Hornai ho Lúcia Lobato mós hato’o sira-nia kontribuisaun kona-ba nesesidade atu hametin kooperasaun institusionál liuliu iha área formasaun majistradu no modernizasaun sistema justisa.
Tanba ne’e Ministru Justisa hateten katak, Governu Timor-Leste konsidera dezenvolvimentu rekursu umanu hanesan prioridade estratéjika ida atu garante sustentabilidade reforma setór justisa nian.
Tuir nia, parte rua diskute oinsá Portugál bele kontinua fó apoiu tékniku no profisionál bá Timor-Leste liu-husi programa formasaun, interkámbiu no asesoria bá instituisaun judisiária sira.
“Diskusaun sira fó énfaze ba fortalesimentu kooperasaun iha área formasaun majistradu sira, hametin Sentru Formasaun Jurídika no Judisiária Timor-Leste no promove programa interkámbiu entre instituisaun judisiária sira hosi nasaun rua,” Ministru Justisa hateten.
Aleinde ne’e iha enkontru ne’e mós aborda nesesidade atu prepara jerasaun foun bá kuadru judisiáriu Timor-Leste liuhosi programa bolseiru no formasaun universitária iha área Direitu, hodi asegura kualidade no sustentabilidade sistema justisa iha futuru.
Jornalista : Alexandra da Costa
Editór : Cancio Ximenes
