DILI, 08 Jullu 2026 (TATOLI)—Diretór Ezekutivu Hospitál Nasionál Guido Valadares (HNGV), Nuno Vital Soares, husu TATOLI nafatin sai matan no tilun ba públiku hodi fó sai informasaun ne’ebé loos no kredivel.
“Ami espera katak TATOLI bele sai lian, matan no tilun ba públiku liuhusi sira-nia kobertura ne’ebé mak durante ne’e hala’o loro-loron iha HNGV,” Nuno Vital Soares hateten ba Agência TATOLI relasiona ho aniversáriu Agência TATOLI, Institutu Públiku (TATOLI, I.P) ba da-X (27 Jullu 2026 – 27 Jullu 2026) iha nia kna’ar fatin HNGV, Bidau Tokoh Baru, ohin
Nia tau esperansa boot ba Agência TATOLI katak tenke hato’o povu nia lian ba públiku no saida mak HNGV hasoru, tanba ne’e fó konfiansa tomak no parabenzia TATOLI nia aniversáriu ne’e ba da-X ne’e.
“Ha’u-nia rekomenadasaun ba TATOLI nafatin mantein profisionalizmu iha reportajen sira nomós informasaun sira-ne’ebé mak iha sempre verfika ho fonte sira no ba futuru nafatin kuidadu informasaun sira-ne’ebé mak kredivel,” nia dehan.
Ajénsia TATOLI, I.P nu’udár ajénsia ofisiál Estadu Timor-Leste nian. Ezisténsia TATOLI, I.P. maihusi inisiativa Sekretaria Estadu Komunikasaun Sosiál (SEKOMS), iha 2012-2017 nu’udár transformasaun husi ETNA (East Timor News Agency), ne’ebé nakfilak ba ANTIL (Ajénsia Notisioza Timor-Leste).
Ajénsia Estadu ne’e hetan aprovasaun iha Konsellu-Ministru no públika iha Jornál Repúblika iha loron 14 Marsu 2016, nu’udár embriaun ho naran ANTIL ne’ebé lansa iha 27 Jullu 2016. Fulan-Marsu 2017, Konsellu-Ministru aprova ANTIL sai TATOLI, nu’udár ajénsia ofisiál Estadu Timor-Leste nian no publika iha Jornál Repúblika, ho estatutu nu’udár Institutu Públiku (I.P.).
Objetivu estabelese ajénsia TATOLI, I.P. sai fonte informasaun ofisiál Estadu Timor-Leste neʼebé iha kapasidade elabora produtu informasaun no notísia ne’ebé nesesita husi públiku utilizadór informasaun iha eskala nasionál, rejionál no internasionál bazeia ba natureza no karakterístika; rapidéz no rigór, maibé labele ignora nia rigorozidade hanesan akurásia, indepedente, inzenta, klareza no nafatin iha integridade no mós kredibilidade.
Jornalista : Felicidade Ximenes
Editór : Cancio Ximenes
