DILI, 01 Jullu 2026 (TATOLI) – Prezidente Parlamentu Nasionál, Maria Fernanda Lay, simu audiénsia husi Embaixadora Austrália ba Timor-Leste, Caitlin Wilson, hodi aborda ortunidade atu hametin kooperasaun bilaterál iha área oioin, liuliu iha promosaun igualdade jéneru no fortalese sistema demokrasia.
Caitlin Wilson dehan sorumutu ne’e ko’alia kona-ba kooperasaun entre Parlamentu Nasionál Timor-Leste ho Parlamentu Austrália nian, liuliu iha área sira ne’ebé sai prioridade ba instituisaun rua.
Tuir diplomata, Austrália hakarak kontinua apoia Grupu Feto Parlamentár Timor-Leste (GMPTL, sigla portugés) liuhusi formasaun hodi reforsa papél GMPTL ne’e iha promosaun igualdade jéneru no dezenvolvimentu parlamentár. Nia mós reafirma kompromisu Austrália atu hametin kooperasaun ho Timor-Leste hodi promove sistema demokrasia ne’ebé forte.
Nia lembra katak iha fulan hirak liubá, Prezidente Senadu Austrália Osidentál halo vizita mai Timor-Leste hodi diskute kooperasaun iha área oioin. Iha 23 Abríl 2026, Prezidente Senadu Austrália, Sue Lines, vizita Parlamentu no halo enkontru ho Prezidente GMPTL, Aliança da Conceição Araújo, ho akompaña husi membru grupu nian.
Iha okaziaun ne’ebá, deputada Aliança Araújo espresa nia haksolok ba vizita ne’e no agardese ba apoiu no solidariedade Austrália nian ba Timor-Leste dezde períodu luta, espesialmente iha promosaun igualdade jéneru.
“Kooperasaun bilaterál ida-ne’e hatudu progresu signifikativu iha serbisu no programa sira entre nasaun rua ne’e, liuhusi interkámbiu parlamentár ba promosaun igualdade jéneru”, dehan.
GMPTL mós reafirma nia prontidaun atu kontinua serbisu hamutuk ho Governu Austrália, liuhusi Embaixada Austrália nian iha Timor-Leste hodi kontribui ba dezenvolvimentu país ne’ebé igualitáriu, inkluzivu no sustentavel.
Notísia relevante: https://tatoli.tl/2026/04/24/fernanda-lay-sue-lines-aborda-kona-ba-promosaun-ba-igualdade-jeneru-no-seguransa-maritima/
Jornalista: Nelson de Sousa
Editora: Maria Auxiliadora
