DILI, 24 Abríl 2026 (TATOLI)-Prezidente Parlamentu Nasionál (PPN) Timor-Leste, Maria Fernanda Lay, simu vizita husi Senadora Austrália Osidentál, Sue Lines, ho ekipa hodi diskute kestaun igualdade jéneru, seguransa marítima no relasaun bilaterál.
Maria Fernanda Lay partilla iha sorumutu ne’e katak Timor-Leste iha ona Lei Violénsia Doméstika no ida-ne’e hanesan krime públiku. Maibé, iha nia implementasaun sei hasoru dezafiu barak.
“Delegasaun Austrália partilla sira-nia esperiénsia kona-ba saida mak tenke hadi’a, no ha’u husu konkretamente katak ita presiza atividade prátika ne’ebé bele sai realidade, la’ós de’it programa ne’ebé luan liu, liuliu ba vítima sira”, nia hateten.
Iha enkontru ne’e toka kona-ba adezaun Timor-Leste ba Asosiasaun Nasaun Sudeste Aziátiku (ASEAN, sigla inglés), masķi iha dezafiu maibé ho apoiu husi país membru no nasaun viziña hodi partilla valór sira iha komunidade ASEAN nian.
Toka mós asuntu sobre Greater Sunrise ne’ebé ekonomikamente importante tebes ba povu Timor-Leste, depois primeiru-ministru Timor-Leste ho nia omólogu australianu ne’ebé asina ona deklarasaun konjunta.
“Ita hein katak prosesu ne’e bele avansa ba oin lalais, tamba ekonomia Timor-Leste depende boot ba rekursu naturál iha tas”, Fernanda salienta.
Diskute mós kona-ba seguransa marítima, liuliu kestaun peska ilegál ne’ebé Timor-Leste sei falta kapasidade atu kontrola.
Fernanda Lay espresa gratidaun boot ba kooperasaun Austrália nian ne’ebé apoia di’ak tebes Timor-Leste durante períodu ne’e.
Biban ne’e, Senadora Sue Lines konvida Fernanda Lay atu hala’o vizita ofisiál bá Austrália iha tempu badak.
Jornalista: Nelson de Sousa
Editora: Maria Auxiliadora
