DILI, 08 Jullu 2026 (TATOLI)-Reuniaun Konsellu Ministru ohin aprova tetu indikativu ba Orsamentu Jerál Estadu (OJE) 2027 hamutuk billaun $2,1.
Iha sorumutu ne’e mós Ministra Finansa, Santina Viegas Cardoso, halo aprezentasaun ida kona-ba preparasaun OJE ba tinan oin, foka liu ba adosaun abordajen orsamentasaun ne’ebé bazeia ba prioridade polítika nomós utilizasaun estimativa futuru nian nu’udar baze ba prosesu orsamentál.
Tuir komunikadu husi Governu, aprezentasaun ne’e destaka prosesu preparasaun OJE 2027 nian, inklui pontu situasaun husi serbisu sira ne’ebé hala’o husi Komité Revizaun Polítiku, prioridade polítika Governu nian ne’ebé analiza hela metodolojia hodi dezenvolve ninia proposta sira, no enkuadramentu estimativa orsamentu plurianuál nian.
Aleinde ne’e, ministra aprezenta mós pasu sira tuirmai iha prosesu ne’e, ne’ebé inklui elaborasaun proposta husi entidade responsavel sira, análize ba proposta ne’e husi Ministériu Finansa, no avaliasaun tuirmai ba opsaun orsamentál sira.
Hafoin aprezentasaun, Konsellu Ministru apoia Komité Revizaun Polítiku nia orientasaun kona-ba Prioridade Polítika 28 Governu nian, nomós identifikasaun ba entidade sira ne’ebé responsavel hodi elabora proposta detallada idaidak, inklui estimativa ba kustu tinan barak nian, kalendáriu implementasaun, no enkuadramentu ba monitorizasaun no avaliasaun liuhusi indikadór dezempeñu sira.
Konsellu Ministru mós apoia estimativa ba Futuru ne’ebé sei sai hanesan baze ba prosesu preparasaun OJE ba tinan lima oinmai.
Jornalista: Arminda Fonseca
Editora: Maria Auxiliadora
