DILI, 09 Jullu 2026 (TATOLI)-Autoridade Nasionál Petróleu (ANP) informa katak konklui ona avaliasaun ba Planu Dezenvolvimentu Kampu (Field Development Plan – FDP) ba Kuda-Tasi no Jahal, neʼebé submete husi Finder Timor-Leste B.V., operadór ba KFP TL-SO-T 19-11 ho parseiru Timor GAP PSC 11-106 Unipessoal Limitada.
Tuir nota ida ne’ebé Tatoli asesu, ANP simu dokumentu FDP iha loron 22 Maiu 2026. Hafoin simu dokumentu ne’e, ANP hala’o avaliasaun no reuniaun lubuk ida atu verifika nia konformidade ho Kontratu Fahe Produsaun (KFP), lei no regulamentu sira neʼebé aplikavel, nomós atu asegura benefísiu ba Estadu Timor-Leste.
Rezultadu avaliasaun ne’e hato’o ba Finder, no empreza atualiza dokumentu no submete fali versaun finál ba ANP iha loron 24 Junu 2026.
Bazeia ba avalisaun téknika, komersiál, operasionál no konformidade tuir lei ne’ebé aplikavel ba Planu Dezenvolvimentu Kampu (FDP), ANP konsidera katak konseitu dezenvolvimentu ne’ebé selesionadu fó estrutura adekuada ba dezenvolvimentu kampu Kuda-Tasi no Jahal.
FDP hatudu mós katak instalasaun sira ne’ebé propoin, estratéjia produsaun, jestaun rezervatóriu, planu ezekusaun projetu no sistema jestaun saúde, seguransa no ambiente (HSE) dezenvolve ona tuir mellór prátika iha indústria petróleu no bele apoiu dezenvolvimentu rekursu petróleu ho seguru no efisiente, tuir kondisaun no kompromisu ne’ebé aprovadu ona.
Durante prosesu avaliasaun nia laran, ANP halo avaliasaun, inklui mós item relevante sira seluk, viabilidade téknika husi konseitu dezenvolvimentu ne’ebé propoin, rekuperasaun rekursu, no instalasaun produsaun, estudu ekonomia ba projetu dezenvolvimentu, konsiderasaun ambientál no sosiál, nomós kompromisu kona-ba konteúdu lokál, estratéjia aprovizionamentu nomós kumprimentu husi Finder ba lejizlasaun petróleu neʼebé aplikavel no obrigasaun sira ne’ebé prevee ona iha kontratu partilla produsaun.
Avaliasaun ne’e konsidera mós kompromisu sira atu asegura aprovasaun jurídiku ne’ebé presiza molok no durante prosesu dezenvolvimentu ba kampu Kuda-Tasi no Jahal ne’ebé tenke kumpre lei ne’ebé aplikavel, nomós mellór prátika iha indústria petrolífera.
ANP konsidera katak FDP responde ona rekizitu prinsipál sira iha área téknika, komersiál no regulatória ne’ebé presiza atu ezekuta iha faze dezenvolvimentu projetu.
Ho baze ba rezultadu avaliasaun, ANP aprova ona FDP ba kampu Kuda-Tasi no Jahal ne’ebé hola parte iha KFP TL-SO-T 19-11 nia-laran, ho kondisaun katak termu no kompromisu sira ne’ebé hakerek iha planu tenke kumpre, inklui obrigasaun jurídiku, ambientál, seguransa durante implementasaun projetu.
Haree ba pontu sira iha leten, aprovasaun husi ANP sei permite operadór atu kontinua implementa atividade dezenvolvimentu ne’ebé propoin, nafatin sujeitu ba supervizaun regulatória no kontinua monitorizasaun husi ANP.
Aprovasaun ba FDP ba Kampu Kuda-Tasi no Jahal hatudu kolaborasaun ne’ebé forte no produtiva entre ANP, Finder no Timor GAP, nune’e bele garante katak atividade petróleu ne’ebé hala’o iha área jurisdisaun Timor-Leste, sei kumpre tuir lejizlasaun ne’ebé aplikavel no aumezmu tempu atu masimiza benefísiu komersiál no sosioekonómiku ba Timor-Leste.
Notisía relevante: ANP simu dokumentu kona-ba planu dezenvolvimentu ba projetu kampu Jahal no Kuda Tasi
Jornalista: Arminda Fonseca
Editora: Maria Auxiliadora
