DILI, 09 Jullu 2026 (TATOLI)-Deputadu sira husi bankada Kongresu Nasionál Rekonstrusaun Timorense (CNRT, sigla portugés), Frente Revolusionária Timor-Leste Independente (FRETILIN) no Kmanek Haburas Unidade Nasionál Timoroan (KHUNTO), husu ba Ajénsia Notisioza Timor-Leste Tatoli, I.P tenke sai ajénsia ne’ebé imparsiál no indepedente iha publikasaun ba informasaun sira.
Mensajen ida-ne’e sira hato’o iha ámbitu selebrasaun aniversáriu Tatoli ba da-X (27 Jullu 2016-27 Jullu 2027.
Deputadu CNRT, Natalino dos Santos, elójia serbisu Tatoli ne’ebé hatudu avansu di’ak hodi tranzmite informasaun husi nasionál to’o baze ba povu hodi akompaña, liuliu prosesu demokratizasaun no dezenvolvimentu ne’ebé la’o.
Tuir nia, Tatoli nu’udar elementu ida importante ida iha mídia ne’ebé iha nia identidade, kultura no karáter rasik, espera ho tinan ida aumenta atu hala’o serbisu ho di’ak liután.
“Dala-ida tan, hakarak apresia no kongratula Ajénsia Tatoli, husi nia lideransa to’o funsionáriu sira. Imi-nia idade komesa avansa, husu imi atu hala’o knaar imparsiál, independente, prinsípiu nasionalizmu no patriotizmu, eklíbriu hodi fó informasaun ba públiku ne’ebé ho konstrutivu atu hadi’a nasaun”, nia hato’o.
Hodi husu atu konsoida nafatin, liuliu kapasitasaun ba jornalista sira hodi elava kapasidade, nune’e bele reforsa instituisaun hodi fó informasaun adekuada ba povu no nasaun.
Iha fatin hanesan, deputada FRETILIN, Nurima Ribeiro Alkatiri, parabeniza Tatoli baaniversáriu ida-ne’. Tuir nia, mídia iha Timor-Leste ninia knaar la fásil, hasoru difikuldade barak, maibé Tatoli nafatin hakat ba oin. “Mezmu, ita hatene Tatoli ne’e Ajénsia Estadu nian, espera katak kontinua ba oin ho imparsialidade, hato’o lia-loos ba públiku tomak”, nia hateten.
Nurima Alkatiri dehan iha momentu ida ne’ebé mosu mós kona-ba Lei Kriminaliza Difamasaun ne’ebé sei kria mós obstákulu ba mídia sira no espera Tatoli asume papél ida importante.
“Tatoli tenke kontinua imparsiál no uka lia-loos, labele husi presaun sé de’it, nune’e bele garante katak ita fiar nafatin notísia sira Tatoli fó sai”, nia salienta.
Nia husu atu halo kobertura kle’an liután ba asuntu sira ho detallu ho baze ba dadus, la’ós de’it fonte nia ko’alia no sujere atu hasa’e mós kobertura ba asuntu internasionál sira, tanba mundu ohin loron la’ós moris izoladu.
Deputadu husi bankada KHUNTO, António Verdial de Sousa, elojia serbisu mídia estatál ne’e tanba durante ne’e dezempeña ona papél iha progresu ida di’ak no husu atu kontinua hadi’a kualidade notísia.
Notísia relevante: PDHJ Maliana destaka papél importante Tatoli iha promosaun transparénsia no direitu umanu
Jornalista:Nelson de Sousa
Editora: Maria Auxiliadora
