OEKUSI, 09 Jullu 2026 (TATOLI) – Ministériu Edukasaun (ME) liuhusi Sekretáriu Estadu Ensinu Sekundáriu Jerál no Tékniku Vokasionál, planeia ona atu posibilidade ihha tinan-2027, sei estabelese klase paralelu ida ba ensinu sekundáriu jerál iha Baoknana suku Bene-Ufe sub-rejiaun Nítibe Rejiaun Administrativa Espesiál Oekusi Ambenu (RAEOA).
Tanba ne’e, molok estabelese, iha segunda-feira semana ne’e, Sekretáriu Estadu Ensinu Sekundáriu Jerál no Tékniku Vokasionál, Domingos Lopes Lemos, akompaña husi Diresaun Rejionál Serbisu Edukasaun Oekusi, hala’o uluk sensibilizasaun hodi informa ba entidade sira iha sub-rejiaun Nítibe, nune’e bele apoia.
“Ita mai vizita Ensinu Báziku Sentrál (EBC, sigla portugés) Baoknana, no enkontru mós ho komunidade sira, líder igreja, veteranu, autoridade lokál no profesór sira, tanba planu atu estabelese klase paralelu Ensinu Sekundáriu iha Baoknana, tenke rona mós preokupasaun no rekomendasaun sira, maibé hothotu tenke apoia,” nia dehan iha salaun edukasaun Oekusi, tersa ne’e.
Membru Governu ne’e esplika, razaun husi estabelesimentu klase paralela ne’e, atu fasilita estudante sira bele asesu ho distánsia besik, durante ne’e sira la’o do’ok, entaun impede ona estudante sira no barak maka abandona eskola, tanba distánsia dook.
“Tan ne’e maka ita mai fó hanoin no sensibiliza ba sira, karik depoisde exame nasionál tinan oin mak sei estabelese klase paralelu ensinu sekundáriu jerál, ha’u hanoin sei apoia tebes estudante sira husi Baoknana, Citrana liliu suku tolu iha perténsia tasi-ibun bele asesu ona, tanba kada tinan bainhira akaba tenki ba vila hodi kontinua ba ensinu sekundáriu, ne’ebé enkontru ne’e nia objetivu atu husu apoia inan-aman no parte hotu,” nia hateten.
Nia informa, bainhira estabelese ona, maka klase paralela Baoknana sei tutela ba Ensinu Sekundáriu Jerál Palaban iha Pante Makasar.
Notísia relevante:Sekretáriu Estadu ME konsidera ETV Pássabe sai referénsia aplika aprendizajen ho dijitál
Iha biban Jestór sub-rejiaun Nítibe, Agustinho Afulit, reprezenta komunidade Nítibe, apresia tanba planu atu estabelese klase paralela, sei fasilita estudante sira iha suku tolu bele asesu ho distánsia besik, hanesan suku Usitaku, Suni-Ufe no Bene-Ufe.
“Tinan hirak liubá, Governu konsege harii ensinu sekundáriu ida tékniku vokasionál peska nian, maibé lakle’ur taka ona tanba laiha manorin, ne’ebé agradese tebes kuandu tinan oin Governu loke fali ba ensinu sekundáriu jerál, ha’u hanoin ne’e importante tebes, tanba sei fasilita oan sira, tanba durante tinan barak kuandu ami-nia oan sira ba kontinua fali iha vila-laran, no barak maka la kontinua tanba dook, ne’ebé husi suku ne’ebé sei sai alvu, ami espera planu tenke realiza duni, tanba ami hein tinan barak ona,” nia orgullu.
Jornalista: Abílio Elo Nini
Editór: Rafael Ximenes de A. Belo
