OEKUSI, 08 Jullu 2026 (TATOLI) – Ministériu Edukasaun (ME) liuhusi Sekretáriu Estadu Ensinu Sekundáriu Jerál no Tékniku Vokasionál, Domingos Lopes Lemos, konsidera Eskola Tékniku Vokasionál (ETV) São João Paulo II iha suku Abani sub-rejiaun Pássabe Rejiaun Administrativa Espesiál Oekusi Ambeno (RAEOA) sai referénsia ba aplikasaun sistema dijitál iha prosesu aprendizajen to’o ezame períodu.
Governante ne’e, hato’o nia sentimentu ksolok, hafoin hala’o vizita iha tersa ne’e, hodi oferese fasilidade teknolojia hanesan komputadór unidade neen no mákina impresora ida ba Eskola Tékniku Vokasionál São João Paulo II.
Notísia relevante:Reforsa multimedia no kualidade aprendizajen, ME entrega komputadór ba ETV Palaban Oekusi
Sekretáriu Estadu Ensinu Sekundáriu Jerál no Tékniku Vokasionál, Domingos Lopes Lemos, hateten, Eskola Tékniku Vokasionál (ETV) São João Paulu II, hatudu ona nia referénsia ida ba territóriu tanba prosesu ensinu aprendizajén to’o ezame períodu aplika de’it sistema dijitál no evita ona utiliza surat-tahan atu utiliza iha eskola.
“Tinan kotuk, ami mai vizita ona eskola ne’e, ami observa direitamente prosesu utilizasaun ekipamentu téknolojia kapa’as tebes, parabens ba imi nia esforsa, tanba hafasíl estudante sira iha prosesu ezame períodu, la utiliza ona surat-tahan,” nia hateten iha suku Usitako sub-rejiaun Nítibe, tersa ne’e.
Governante ne’e fundamenta, polítika ne’e nu’udar referénsia ida, tanba ne’e Ministériu Edukasaun mós sei hamosu planu ida ba ETV sira, atu define eskola balun sai pilotu, atu estabelese prosesu aprendizajen ho sistema dijitál de’it, evita ona hakerek iha surat-tahan.
“Tanba ne’e maka ohin ita mai oberva ona, eskola ne’e padre sira mak lidera, ita sei konvida sira atu apoia fó kapasitasaun kona-ba polítika estabelesimentu programa ne’e, ekipamentu saida mak presiza halo instalasaun, ne’ebé ita sei konvida padre sira husi ETV Pássabe atu fasilita informasaun detallu, nune’e bele implementa ho fazeadamentu ba eskola sira-ne’ebé identifikadu ona liliu ba ETV sira,” nia hateten.
Diretór ETV São João Paulo II IHA Pássabe, Padre Agostu Hermengildo Nunes, agradese tanba liuhusi prezensa Ministériu Edukasaun iha ETV Pássabe lori ekipamentu balun hanesan komputadór no mákina impresora.
“Ami agradese tanba ekipamentu sira-ne’e, ami presiza duni ba eskola ne’e, tanba ami iha departementu rua, informátika no agrikola ho sistema ezam mós uza sistema komputadór no telefoni android, entaun ita uza komputadór server, pontu ezame sira tau hotu iha sistema laran, depois soe ba komputadór servér no idak-idak elabora rasik liuhusi komputadór no telefoni, tan ne’e liuhusi apoia fasilidade hirak-ne’e, ami agradese tebes tanba ajuda tebes ami iha prosesu aprendizajén,
Saserdote ne’e, esplika, durante ne’e Eskola Tékniku Vokasionál São João Paulo Pássabe aplika ona ezame ho sistema dijitál atu redús gastu ba surat-tahan.
“Polítika ne’e ita foin hahú atu koko la’o tuir dezenvolvimentu téknolojia nian, tanba mundu ohin loron avansadu ona sistema dijitál, entaun ita-nia eskola ne’e aplika hodi evita utilizasaun surat-tahan, nune’e uza de’it komputadór ho telefoni, hodi tulun estudante no profesór sira, bainhira iha tempu ezame karik lalika iha kleur tan ba korije pontu ezame sira, tanba iha exame ne’e idak-idak priénxe rasik ho hatene kedas nia valór, ida-ne’e mós ita la’o tuir kurríkulu Ministériu Edukasaun,”
Notísia relevante:ME planeia sosa pakote komputadór no projetór unidade 30 ba ESTV
Entretantu, totál estudante ne’ebé daudaun ne’e hala’o hela estudu iha Eskola Tékniku Vokasionál São João Paulo Pássabe hamutuk na’in-130 ho totál profesór na’in-14.
Jornalista: Abílio Elo Nini
Editór: Rafael Ximenes de A. Belo
