DILI, 25 outubru 2024 (TATOLI)—Ministériu Edukasaun (ME) planeia iha tinan oin halo prosesu aprovizionamentu ba pakote komputadór no projetór unidade 30 ba Eskola Sekundáriu Tékniku Vokasionál (ESTV).
“Ita planeia ona ba tinan oin no ida-ne’e tenke realiza duni tanba importante no nesesáriu ba ita-nia estudante sira ne’ebé eskola iha Ensinu Sekundáriu Tékniku Vokasionál. Projetór ne’e importante ba Eskola Tékniku Vokasionál sira, tanba ne’e ita halo planu hodi sosa. Ida-ne’e importante tanba bele utiliza ba aprenzentasaun matéria. Ida-ne’e mós halo parte teknolojia multimedia nian,” Diretór Nasionál Sekundáriu Tékniku Vokasionál iha ME, Fernando Mouzinho Gama, informa ba Agência Tatoli, iha ninia knaar fatin, Vila-Verde, sesta ne’e.
Pakote komputadór no projetór ne’e sei fó prioridade ba eskola ne’ebé laiha ekipamentu.
“Eskola hamutuk 15 mak menus ekipamentu nune’e ita planeia ona ba tinan 2025. Kada munisípiu iha eskola rua to’o tolu no ita bele dehan 50% mak menus. La’ós de’it menus komputadór no projetór maibé laboratóriu no impresora. Ida-ne’e presiza nune’e bele fasilita estudante hodi mellora sira-nia siénsia teknolojia ho di’ak,” nia akresenta.
Notísia relevante : Governu Xina apoiu ekipamentu ba eskola lima iha Dili
ME prevee $113.098.784 iha proposta Orsamentu Jerál Estadu (OJE) 2025 hodi finansia programa lima, sub-programa 15 no atividade 115.
Nune’e, ba tinan oin, ministériu mantein nafatin programa lima hanesan programa rekursu umanu, kuríkulu, infraestrutura, jestaun eskolár, Edukasaun inkluziva.
Jornalista : Osória Marques
Editora : Julia Chatarina
