DILI, 08 abril 2022 (TATOLI)–Governu Repúblika Popular Xina liuhosi Programa Ai-han Mundiál (WFP, sigla portugés) apoiu ekipamentu ba estrakurrikulár iha eskola lima, ne’ebé hanesan parte ida hosi programa seguransa ai-han no pakote nutrisaun.
Reprezentante WFP iha Timor-Leste, Dageng Liu, agradese ba kooperasaun di’ak ho Ministériu Edukasaun Juventude no Desportu (MEJD) hodi suporta nafatin programa nutrisaun ba saúde eskolár.
“Ita oferese sasán ba estudante sira atu fasilita sira-nia abilidade aprende, hodi reforsa talentu no hadi’a kondisaun fíziku, saúde, desportu no múzika,” Dageng Liu hateten iha eskola Darlau iha suku Balibar, postu administrativu Cristo Rei, munisípiu Dili, sesta ne’e.
Sasán ne’ebé distribui ba eskola lima mak hanesan kuadru mutin hamutuk 100, kantilla 3.200, bola 100, audio speaker 10, viola 10, piano eletróniku 10 no komputadór lima.
Eskola lima ne’ebé sai benefisiáriu ba programa ne’e mak hanesan Ensinu Báziku Sentrál (EBC, sigla portugés) Manleuana, EBC Metinaro, Ensinu Báziku Filiál (EBF) Le-laus, EBF Lebutu no EBC Darlau.
Tuir Reprezentante WFP, programa refeisaun eskolár ne’ebé hahú ona iha eskola lima iha Dili sei fasilita mós atividade estrakurrikulár no prosesu aprendizajen.
Tanba ne’e, WFP serbisu hamutuk ho Embaixada Xina iha Timor-Leste hodi suporta no distribui ekipamentu ba eskola lima.
Iha biban hanesan, Embaixadór Xina iha Timor-Leste, Xiao Jianguo, hateten, antes ne’e liuhosi WFP entrega ona fundu $950.000 ba MEJD hodi apoiu programa seguransa ai-han no pakote nutrisaun iha eskola lima ne’e.
“Fundu ne’ebé WFP ho MEJD jere daudaun ne’e, ohin bele hetan rezultadu liuhosi seremónia inaugurasaun dapur eskola ho fasilidade bee-moos no entrega sasán doasaun ba estudante sira iha Eskola EBC 123 Darlau,” Diplomata ne’e tenik.
Notísia relevante: Governu Xina prevee $950.000 hodi apoia fasilidade eskola EBC lima
Embaixadór dehan, Governu Xina ho disponibilidade boot hakarak ajuda ho meiu oinoin, hodi rezolve no redús hamlaha inklui hadi’a kondisaun atu kura problema má-nutrisaun iha Timor Leste.
Iha fatin hanesan, Diretór Eskola EBC Darlau, Manuel Soares da Silva, agradese ba Embaixada Xina, WFP no MEJD tanba halo ona kooperasaun di’ak hodi realiza ona programa seguransa ai-han no pakote nutrisaun iha eskola ne’e.
“Materiál sira ne’e atu ajuda dezenvolve kapasidade estudante sira,” nia hateten.
Jornalista : Tomé Amado
Editora : Julia Chatarina
