DILI, 11 marsu 2021 (TATOLI)--Ministériu Saúde (MS) liuhosi Servisu Komisaun Rejionál Prevensaun no Mitigasaun Surtu COVID-19, halo teste swab ba Prezidente Autoridade (PA) Rejiaun Espesiál Oé-cusse no Ambeno (RAEOA) no Zona Ekonomia Espesiál Sosiál Merkadu, Timor-Leste (ZEESM, TL), inklui funsionáriu sira hamutuk 126.
Atividade ne’e hahú loron 09 to’o 10 marsu, liuhosi kooperasaun Servisu Komisaun Rejionál Prevensaun no Mitigasaun Surtu COVID-19 RAEOA, Pilár 5 noo 3, ho kolaborasaun Gabinete PA.
Funsionáriu 126 ne’ebé submete ba teste, hosi servisu unidade tuteladu, inklui funsionáriu Gabinete PA RAEOA e ZEESM TL, Sekretária Rejionál Adjunta Prezidente Autoridade Reforsu Institusionál, Sekretáriu Rejionál Adjuntu Prezidente Autoridade Asuntu Sosiál no Sekretária Rejionál Finansa.
“Ha’u husu halo teste swab COVID-19 ba ema hotu ne’ebé tama iha kampaun Gabinete Prezidente Autoridade, no karik halo kontaktu ho ema na’in-ualu ne’ebé mai hosi Ministériu Finansa (MF), Dili,” PA RAEOA-ZEESM,TL, Arsénio Paixão Bano, informa ba Agência TATOLI, via telefónika, kinta ne’e.
Prezidente Autoridade haktuir, inisiativa halo teste tanba iha segunda, 08 marsu, funsionáriu tékniku RAEOA na’in-haat ne’ebé halo formasaun iha MF ramata ona no fila hosi Dili mai Oé-cusse, no funsionáriu na’in-haat seluk hosi MF ne’ebé daudaun ne’e tulun hela tékniku sira iha Sekretaria Rejionál Finansa.
“Ita hakarak teste ida-ne’e tanba RAEOA hakarak prevene surtu COVID-19, liuliu bele hatene liután ameasa vírus ne’e,” nia akresenta.
Iha loron 09 marsu, Servisu Komisaun Rejionál Prevensaun no Mitigasaun Surtu COVID-19 RAEOA, Pilár 5 no 3 konsege halos teste swab nose ba ema na’in-110 no iha loron 10 marsu halo tan ba ema na’in-16, ne’ebé hamutuk 126.
Rezultadu ne’ebé hasai iha loron 10 marsu, teste swab ba ema 20 no na’in-hitu ne’ebé mai hosi Dili negativu, enkuantu na’in-106 sei hein rezultadu.
Jornalista: Florêncio Miranda Ximenes
Editora: Julia Chatarina
