DILI, 06 abríl 2022 (TATOLI)—Relasiona ho presu mina, Diretór Jerál Sekretariadu Tékniku Adminitrasaun Eleitorál (STAE), Acilino Manuel Branco, hateten órgaun eleitorál sei buka solusaun iha tempu badak ba dezlokasaun eleitór sira fila ba ida-idak nia Munisípiu hodi partisipa iha eleisaun prezidensiál ne’ebé realiza iha 19 abríl 2022.
“Liga ho mina presu sa’e, STAE no CNE antisipa ona atu halo enkontru ho parte hotu liu-liu entidade Estadu no Governu hodi kontribui idea nune’e hetan solusaun no garante fasilita sidadaun sira ba vota iha ida-idak nia munisípiu,” Acilino hateten ba Agência TATOLI, iha nia knaar fatin Caicoli, Dili, kuarta ne’e.
Ba asuntu ne’e, nia dehan, CNE no STAE halo konkordansia nune’e iha tempu badak bele iha solusaun molok tama ba eleisaun prezidensiál segunda volta.
“Presu mina sa’e bele afeta mós partisipasaun ita-nia sidadaun iha eleisaun prezidensiál segunda volta nian maibé kona-ba nesesidade ba operasionál nian ne’e garante tebes,” nia dehan.
Aspetu operasionál órgaun eleitorál garante 100% no sei la prejudika preparasaun eleisaun prezidensiál segunda volta ne’e.
Antes ne’e, Sekretariadu Tékniku Administrasaun Eleitorál (STAE) rejista eleitór hamutuk 859.613 ba eleisaun Prezidente Repúlika ne’ebe eleitór 76,88 (660,858) tuir eleisaun kompostu hosi feto 321,392 no mane 339,466 (51,37) ne’ebé sei tuir votasaun iha sentru votasaun 1.200 no estasaun votasaun 1.500 iha territóriu nasionál.
Bazea ba rezultadu ikus ne’ebé Sekretariadu Tékniku Administrasaun Eleitorál (STAE) fó sai, Kandidatu Prezidente Repúblika (PR) hosi CNRT Jose Ramos Horta hetan votu 301,481 (46,58%), kandidatu PR hosi FRETILIN Francisco Guterres “Lu-Olo” hetan votu 143,408 (22,16%).
Kandidata hosi KHUNTO Armanda Berta dos Santos hetan votu 56,289 (8,70 %), kandidatu independente Lere Anan Timur hetan votus 48,959 votu (7,57%), kandidatu hosi PD Mariano Assanami Sabino hetan 47,008 votus (7,57%), kandidatu hosi PDRT Anacleto Bento Fereeira hetan 13,059 (2,02 %).
Kandidatu independente Martinho da Silva Gusmao hetan votu 8,485 (1,31% ), kandidatu independente Hermes da Rosa Correia Barros hetan votu 7,58 (1,23%), kandidata indendente Milena Pires hetan votu 5,335 (0,082%), kandidata independente Isabel da Costa Ferreira hetan votu 4,165 (0,64%).
Kandidatu independente Felizberto Araújo Duarte hetan votu 2,615 (0,40 %) Constancio Pinto hetan votus 2,474 (0,38%), kandidatu independente Rogerio Tiago Lobato hetan votu 2,028 (0,31%), kandidatu independente Virgílio da Silva Guterres hetan votu 1,685 (0,26%), kandidatu independente Antero Benedito hetan votu 1,531 (0,24 %) no kandidata independente Ángela Freitas hetan votu 692 (0,11%).
Jornalista : Osória Marques
Editór : Cancio Ximenes
