DILI, 20 abril 2022 (TATOLI) – Sekretariadu tékniku administrasaun eleitorál (STAE) konklui ona apuramentu iha nível nasionál hafoin kontajen nível munisipál no diaspora.
Diretór jerál STAE, Acilino Manuel Branco, ofisialmente, deklara rezultadu provizóriu apuramentu nasionál ba eleisaun prezidente repúblika segunda volta husi munisípiu 12 inklui Rejiaun autónoma espesiál Oe-cusse Ambeno (RAEOA) no diaspora iha loron kuarta, oras 18:00 iha edifísiu STAE nasionál, Caicoli, Dili.
Iha apuramentu nasionál, STAE konklui kandidatu prezidente ho númeru sorteiu ida (1), José Ramos Horta ho votu 397.145 votu (62.09 %) no kandidatu ho númeru sorteiu rua (2), Francisco Guterres ‘Lú Olo’ ho votu 242.440 (37.91 %). Ho nune’e responsiblidade husi STAE determina ona.
STAE ohin loron haruka ona rezultadu materiál apuramentu nasionál provizóriu ba Komisaun nasionál eleisaun (CNE, sigla portugés) hodi verifika apuramentu nasionál iha CNE durante 72 oras molok submete ba Tribunál rekursu hodi foti desizaun ikus tuir lei ne’ebé vigora iha Timor –Leste.
“STAE haruka ona materiál eleisaun munisípiu Aileu no munisípiu rua ka tolu ohin loron no materiál eleisaun munisípiu sira seluk sei tuir no materiál diaspora nian hanesan Inglatera, Irlandia Norte, Portugal, Korea sul no Austrália sei haruka mai iha dia 22 abril ba CNE hodi verifika apuramentu nasionál iha nível CNE nian durante 72 oras molok submete ba Tribunál rekursu hodi anunsia ofisialmente vensedór Prezidente Repúblika períodu 2022-2027 tuir lei haruka,” Diretór jerál STAE, Acilino Manuel Branco hateten.
Tuir loloos apuramentu nasionál iha STAE uza loron tolu husi dia 19 to’o 22 hodi konklui maibé ho esforsu maka’as ne’ebé ofisiál STAE sira halo, di’ak, no lalais ho efikasia entaun habadak tempu hodi konklui iha loron ida ho balun de’it.
“Ho nune’e, ha’u hakarak fó apresiasaun no kongratulasaun ba staff STAE tomak ne’ebé hatudu servisu maka’as no di’ak tebes hodi konklui apuramentu nasionál iha nível STAE ho lalais no susesu,’’ ezekutivu ne’e konklui.
Journalista : Camilio de Sousa
Editór: Rafy Belo
