DILI, 27 jullu 2022 (TATOLI)–Prezidente Sub-Komisaun Reguladór Arte Marsiál (KRAM), Cosme Sarmento, informa, ofisialmente halo reabertura ona atividade grupu arte-marsiál (GAM) tolu no arte- rituál ida, iha kampu demokrasia, Viqueque, kuarta ne’e.
“Ohin, ami halo ona reabertura arte-marsiál no arte-rituál ne’ebé durante ne’e Governu taka. Nune’e, reativa fali ona no ba oin ita hein prosesu ba arte-marsiál tolu no arte-rituál sira iha munisípiu Viqueque, hafoin sira bele halo atividade organizasaun,” Cosme Sarmento, hateten ba Agência Tatoli, via telefónika, kuarta ne’e.
Notísia relevante: KRAM husu organizasaun arte-marsiál kumpre desizaun segunda diretiva
GAM ne’ebé halo reabertura mak hanesan Persaudaraan Setia Hati Terate (PSHT), Ikatan Kera Sakti (IKS), Kmanek Oan Rai Klaran (KORKA) no arte-rituál mak hanesan 77
“Ami sei halo koordenasaun nafatin ho arte-marsiál no arte-rituál sira ne’ebé mak iha posibilidade halo treinu, karik mantein regra sira ne’ebé maka iha no presiza iha formadór, fatin, no treinu,” nia akresenta.
Biban ne’e, nia husu organizasaun sira hodi hatama proposta ba Sub-KRAM Viqueque, hafoin halo estudu ba fatin treinu sira maka bele realiza treinu.
“KRAM hamutuk ho Ofisiál Polísial Suku (OPS), xefe aldeia no xefe suku sira sei halo monitorizasaun ba arte-marsiál no rituál sira iha munisípiu Viqueque,” nia tenik.
Serimónia ne’e partisipa hosi Prezidente KRAM nasionál, Administradór munisípiu Viqueque, Komadante Polísia Nasionál Timor Leste (PNTL) Viqueque inklui membru arte-marsiál no rituál sira.
Jornalista : Vitorino Lopes da Costa
Editora : Julia Chatarina
