DILI, 01 Juñu 2026 (TATOLI)-Ministériu Obra Públika (MOP) indemniza ona vítima afetada ba despeju administrativu sira iha Dili, inklui munisípiu, ho totál orsamentu $9.599.306.
Ministru Obra Públika, Samuel Marçal, hato’o informasaun ida-ne’e bainhira hatán ba preokupasaun husi bankada opozisaun FRETILIN no PLP kona-ba vítima sira ne’ebé afetada husi prosesu despezu Governu nian, tanba komunidade balun seidauk simu kompensasaun.
Deputada Maria Angelina Sarmento husi bankada PLP hateten Governu kontinua halo despezu iha Dili no husi perspetiva téknika, situasaun ida-ne’e kria difikuldade boot ba instituisaun relevante hodi responde ba kestaun eletrisidade no bee-moos. Nia dehan bainhira sobu uma tolu ka haat dala-ida hamosu dezafiu ba Bee Timor-Leste (BTL) atu distribui bee ba populasaun sira.
Iha sorin seluk, deputadu Joaquim dos Santos husi bankada FRETILIN mós preokupa ho prosesu despezu sira ne’ebé la’o no husu ba MOP atu vítima sira ne’ebé sofre ne’e selu ona sira-nia direitu.
Hatán ba kestaun ne’e, Ministru Obra Públika, Samuel Marçal, hateten despezu ne’ebé Governu halo atu hadi’a sidade, nune’e presiza sakrifika duni buat balun.
“Ita halo eviksaun lubuk ida iha Dili no Baukau. Selu ona uma-kain hamutuk 1.370 ho osan montante $9.599.306 no balun seidauk selu tanba sei iha prosesu laran. Ita buka no sei selu hotu”, Samuel Marçal dehan.
Notísia relevante: Despeju administrativu: Governu selu ona indemnizasaun ba uma-kain afetada 1,364
Jornalista: Arminda Fonseca
Editora: Maria Auxiliadora
