DILI, 16 Abríl 2026 (TATOLI) – Ministru Obra Públika, Samuel Marçal, afirma iha tinan kotuk, Governu halo ona pagamentu indemnizasaun ba uma-kain sira afetada husi despeju administrativu hamutuk hamutuk 1,364.
Samuel Marçal dehan, iha ámbitu audiénsia públika kona-ba ezekusaun orsamentál ba trimestre dahaat iha 2025 ho Komisaun C, ne’ebé trata Asuntu Finansa Públika, iha Parlamentu, ohin, katak uma-kain sira afetada hamutuk 1,370, husi numéru ne’e hela de’it nain-neen maka seidauk simu indemnizasaun.
Nia lembra katak iha tinan kotuk ministériu aloka orsamentu millaun $10 hodi halo pagamentu indemnizasaun.
Tuir dadus husi Ministériu Obra Públika, Ezekutivu selu ona família afetada sira husi Aimutin 21, Bairru Pite 118, Baukau 12, Bebonuk-aldeia 20 Setembru 78, Bebonuk-aldeia Metin I no II 91.
Enkuantu iha Bekora 151 no nain-ida maka sei iha prosesu pagamentu. Bidau Manumata 28, Bidau Merkadu Sengol 98, Bidau Akadiru-hun neen, maibé tolu husi ne’e sei iha prosesu pagamentu, tanba foin hetan konkordánsia.
Iha Bidau Lesidere rua, Kampu Alor iha aldeia Anin Fuik tolu, Aldeia Baia Leste-Komoro 10, Fomentu I no II iha 414, Aldeia Moris Foun-Komoro 203 no iha nain-rua sei iha prosesu pagamentu.
Iha Kovalima ida, Kuluhun 86, Fatuhada Markoni ida, Aldeia 03-Fatuhada 43, Mascarenhas-Altu Balide tolu no Motael ida.
Governante ne’e rekuiñese katak iha prosesu alargamentu estrada ne’e hamosu preokupasaun barak, tanba rezulta estragu kanalizasaun bee moos ba komunidade ne’ebé besik, ahí mate no rai rahun makas.
“Ha’u atu hatete, ita hothotu konkorda hadi’a ita-nia rai kala’e? Mai ho konsensu ida, ema hotu hakarak, mas se ita hakarak dezenvolvimentu ne’e ba oin, tenke sobu,” Samuel Marçal hateten.
Nia akresenta “Sobu la’ós tempu naruk husik hela [abandonadu], ita [halo] esforsu tomak, deputadu sira akompaña hela, serbisu kalan no loron, udan atu [bele] hotu lala’is”.
Ministru ne’e hateten, iha tinan 2029, Timor-Leste sei sai uma na’in ba enkontru Asosiasaun Nasaun Sudeste Aziátiku (ASEAN, sigla inglés), tanba ne’e haree ba kondisaun estrada atuál presiza loké tan.
“Ne’e nasaun nia interese, ita hotu koopera. Mas, kompriende ema hotu nia sofrimentu, ne’e hanesan kontribuisaun ida [hodi] harii nasaun ne’e di’ak liután,” nia subliña.
Notísia relasionada: Komisaun E solisita ba MOP aselera indemnizasaun ba família afetada
Jornalista: Nelson de Sousa
Editora: Isaura Lemos de Deus
