DILI, 28 Jullu 2025 (TATOLI) – Komisaun E iha Parlamentu Nasionál ba Asuntu Infraestrutura husu ba Ministériu Obra Públika (MOP) atu aselera indemnizasaun ba vítima afetada ba despezu administrativu no alargamentu estrada iha Dili.
Prezidente Komisaun E, Marcos Xavier, apresia komunidade afetada ne’ebé durante ne’e sempre koopera ho Governu ba alargamentu estrada iha kapitál.
Nia observa katak MOP halo indemnizasaun dignu ba família afetada, ne’ebé utiliza rai Estadu no privadu, inklui lori filafali bá idaidak nia munisípiu ba hirak ne’ebé hakarak fila.
Tuir nia, iha família balun mak to’o agora seidauk halo indemnizasaun, tanba levantamentu dadus ne’e presiza halo verifikasaun fali, inklui uma-kain balun presiza kompleta dokumentu antes halo pagamentu, tanba osan Estadu presiza selu ho loloos.
“Ha’u fiar katak lais ka tarde, ita-nia ema sira ne’ebé Governu hasai hetan fali sira-nia direitu”, nia hateten.
Relembra katak deputadu FRETILIN, Dário Madeira, fó hanoin ba Ezekutivu atu kria kondisaun dignu ba família afetada molok halo despezu administrativu.
Notísia relevante:https://tatoli.tl/2025/06/02/mop-indemniza-familia-afetada-487/
Iha 02 Juñu 2025, MOP indemniza ona uma-kain 487 ho osan montante millaun $4,1. Indemnizasaun ne’e ba família sira ne’ebé hela iha Bebonuk, Bidau Pasar Senggol no Fomentu II.
Jornalista: Nelson de Sousa
Editora: Maria Auxiliadora
