DILI, 02 Juñu 2025 (TATOLI) – Ministériu Obra Públika (MOP) halo ona indemnizasaun ba vítima afetada ba despezu administrativu no alargamentu estrada hamutuk 487.
Diretór-Jerál Administrasaun no Finansa iha MOP, João Amaral, dehan husi totál ne’e família 68 iha parte Bebonuk, aldeia 20 Setembru, mak simu ona pagamentu hamutuk $385.646,29 no falta uma-kain tolu tanba problema iha dokumentu no presiza kompleta.
Iha parte Bidau Pasar Senggol, iha família 75 ho totál pagamentu $439.575,86, falta lima mak seidauk halo tanba prosesa hela dokumentu.
Iha Fomentu II, iha família 263 mak hetan ona indemnizasaun ho totál pagamentu $2.781.115,05, falta uma-kain ida, Fomentu I uma-kain 63 ho osan $383.949,77, falta uma-kain 10, Ai-mutin família rua ho totál pagamentu $18.612,38, Kuluhuan uma-kain 14 ho osan $100.014.71, Baukau ida ho osan $327,78 no Kovalima ida ho osan $3.546,67.
“Indemnizasaun ne’ebé ita halo hahú husi Janeiru to’o agora ho totál orsamentu hamutuk $4.112.788,51. Ida-ne’e ba uma-kain 487 no uma-kain ne’ebé seidauk halo pagamentu tanba sei komplenta dokumentu hamutuk 27 ho nia orsamentu $149.284,26”, João Amaral adianta ba Tatoli, ohin.
Nia esplika aleinde afetadu sira ne’ebé daudaun prosesa atu halo pagamentu hamutuk 56 ho totál osan $275.086,15, ne’e kompostu husi Aitarak-Laran iha família tolu, Bairru Pité/Andevil (AND Hudi-Laran) 27, Bidau Santa Ana Manu Mata 14, Baukau-Samalari 11, no Fatuhada-Markoni ida.
“Pagamentu ne’ebé ita halo la’o hela, ida ne’ebé dadus kompletu ona ita halo pagamentu daudaun. Parte Bekora nian seidauk bele halo tanba afetadu sira seidauk asina termu aseitasaun”, esplika.
Iha sorin seluk Ministru Obra Públika, Samuel Marçal, hateten alargamentu estrada ne’e importante tanba kada loron tráfiku aumenta beibeik, no uma sira ne’ebé daudaun iha dalan públiku sira ne’e sei kategoria temporária.
Bainhira tinan 10 mai uma hotu sai permanente maka alargamentu Estrada sai preokupasaun boot tanba sei iha kustu boot.
Notísia relevante : https://tatoli.tl/2025/04/16/uma-kain-325-iha-fomentu-ii-no-bidau-simu-ona-indemnizasaun/
Jornalista: Arminda Fonseca
Editora: Maria Auxiliadora
