DILI, 16 Abríl 2025 (TATOLI) – Ministériu Obra Públika (MOP) halo ona indemnizasaun ba família 325 ne’ebé afetada ba despeju administrativu iha Fomentu II, antigu Pasar Senggol-Bidau no vítima alargamentu estrada iha Bebonuk.
“Semana kotuk ita halo indemnizasaun ba uma-kain hamutuk 325, husi númeru ne’e alargamentu estrada iha Bebonuk hamutuk 52, despeju administrativu iha Bidau-Senggol 55 no Fomentu II 218. Restu seidauk tanba sei kompleta dokumentu hanesan konta bankária”, Samuel Marçal relata ba TATOLI.
Ba uma-kain balun ne’ebé seidauk hetan pagamentu, governante ne’e dehan tuir previzaun tékniku sira ba kondisaun uma nian, katak posivel fulan ne’e sei halo hotu pagamentu.
Nia esplika katak kona-ba alargamentu estrada husi Kuluhun to’o Bekora, daudaun ekipa téknika sei rekolla dokumentu hotu no lori bá uma-na’in sira atu haree hodi konkorda ho presu ne’ebé iha no aseita ona mak foin prosesu ba pagamentu nian.
Governu sei halo indeminizasaun ne’ebé sura hahú husi rai no uma. “Tanba rai privada laiha ida mak fó gratuita, ita prontu koopera selu, importante mak projetu ne’e bele la’o. Agora, kona-ba rai metru ida selu hira, ida-ne’e Terra no Propriedade mak hatene, sira mak deside presu ne’e loos ona mak ita halo pagamentu”, dehan.
Ba alargamentu estrada husi Kuluhun to’o Bekora komunidade balun konkorda no seluk la’e, maibé Governu kontinua halo serbisu hodi haluan estrada.
Samuel Marçal klarifika katak komunidade balun la konkorda ba alargamentu estrada ho luan metru 23,74, maibé iha sosializasaun dahuluk ne’e marka bazeia ba radius drone nian, entaun ida-ne’e seidauk finaliza no ajusta didi’ak. Aleinde ne’e, iha populasaun balun ne’ebé kolabora tebes no sira sobu daudaun ona uma.
Planu halo alargamentu estrada ne’e, tuir ministru, la’ós naran tur halo, maibé liuhusi estudu dezde iha VII Governu nia tempu. “Ita halo alargamentu ne’e, tanba haree ita-nia nesesidade kanu bee-moos nian, fiu eletrisidade hakoi hotu iha rai-okos hodi organizadu”, dehan.
Nia salienta katak estudu ne’ebé Governu halo ne’e haree ba tinan 10 mai, tanba transporte ne’ebé kada tinan importa mai liu rihun 10, entaun bainhira estrada la loke luan maka sei afeta ba tráfegu.
“Agora loke ona estrada luan, ha’u fiar ba oin 100% sei la sobu tan no komunidade bele halo uma permanente, karik tinan 10 mai iha tráfiku sei la sobu ,maibe kria fali flayover”, nia esplika.
Orsamentu ne’ebé Governu prevee kada tinan ba alagramentu estrada no despeju administrativu hamutuk millaun $2-resin.
Iha sorin seluk, vítima afetada ba despeju administrativu iha Fomentu II, Samuel de Jesus Soares, hateten nia parte simu ona indemnizasaun iha 22 Marsu ne’e.
Nia salienta katak maski antes ne’e Governu sobu sira-nia hela fatin ho urjente, maibé ikus mai rekoñese sira no selu fali saida mak sira gasta ona.
“Ha’u-nia uma momentu sobu ne’e ho medida 5×10, bainhira sobu ami asina termu aseitasaun. Osan ne’ebé ha’u simu tuir duni termu aseitasaun hamutuk $6.106,28”, nia adianta.
Notísia relevante: MOP submete lista vítima despeju administrativu ba Ministériu Finansa
Jornalista: Arminda Fonseca
Editora: Maria Auxiliadora
