DILI, 20 Marsu 2025 (TATOLI) – Ministériu Obra Públika (MOP) haruka ona lista ka dokumentu vítima despeju administrativu balun husi Fomentu II ba Ministériu Finansa (MF) hodi prosesa ba halo pagamentu.
Ministru Obra Públika, Samuel Marçal, hateten tuir ezijénsia sira hotu katak hakarak atu prosesa lalais maibé tenke ho kuidadu, tanba buat hotu iha sistema no sempre iha auditoria, nune’e osan ne’e povu nian, jere ho kuidadu.
“Segunda semana ne’e ha’u foin asina ona dadus balun haruka ona ba Ministériu Finansa atu halo pagamentu ba vítima sira”, Samuel Marçal hateten iha Palásiu Governu.
Nia dehan dadus sira ne’ebé haruka ona ba Ministériu Finansa ne’e nia prosesu bele semana ida ka liu, depende ba sistema tanba importante liu mak dokumentu hanesan konta bankária tenke kompletu, nune’e fulan ida-ne’e bele halo pagamentu.
Iha sorin seluk, Tékniku Reasentimentu husi Diresaun Nasionál Planeamentu, Peskiza no Dezenvolvimentu, Samuel Dany Soares, hateten dadus ne’ebé tékniku prepara submete ona ba ministru aprova hodi halo pagamentu.
“[Pagamentu faze] dahuluk mak ba vítima despeju administrativu husi Fomentu II hamutuk 218, restu seidauk tanba balun seidauk kompleta dokumentu”, dehan.
Ba vítima sira iha atingu Pasar Senggol, Bidau, nian hamutuk uma-kain 89 no ida-ne’e sei iha prosesu nia laran, tanba tékniku sira halo fali verifikasaun didi’ak molok halo pagamentu.
Enkuantu ba Bidau Santa Ana, nia dadus laiha, tanba ne’e ekipa téknika sira sei buka tuir ka rekolla fali dadus molok halo indemnizasaun.
Kona-ba vítima alargamentu estrada husi Kuluhun to’o Bekora, Samuel Dany dehan daudaun ekipa téknika sira iha terrenu no kontinua rekolla dadus.
Antes ne’e, Ministru Samuel Marçal informa katak halo indemnizasaun ba família besik 200 ne’ebé afeta ba despezu administrativu iha Fomentu II no antigu Pasar Senggol– Bidau, iha Fevereiru ne’e.
Notísia relevante: MOP indemniza uma-kain besik 200 iha fulan ne’e
MOP aloka, iha tinan ne’e, millaun $2 hodi halo indemnizasaun ba vítima afetada ba despeju administrativu no alargamentu ba estrada.
Jornalista: Arminda Fonseca
Editora: Maria Auxiliadora
