DILI, 14 Fevereiru 2025 (TATOLI) – Ministériu Obra Públika sei halo indemnizasaun ba família besik 200 ne’ebé afeta ba despezu administrativu iha Fomentu II no antigu Pasar Senggol– Bidau, iha Fevereiru ne’e.
Ministru Obra Públika, Samuel Marçal, dehan tékniku sira hatudu ona lista komunidade afetada atu halo indemnizasaun. “Balun konfirma ona atu halo pagamentu, maibé ha’u haruka sira bá verifika halo didi’ak molok halo pagamentu. Sira ne’ebé loos ona prosesa semana ida ka rua iha fulan ne’e”, governante ne’e informa ba Tatoli.
Iha sorin seluk, tékniku Serbisu Reasentimentu husi Diresaun Nasionál Planeamentu, Peskiza no Dezenvolvimentu, Samuel Dany Soares, adianta katak kona-ba pagamentu ba vítima despezu administrativu hahú, ona iha semana kotuk, asinatura ba termu aseitasaun, liuliu ba komunidade afetada husi Bidau-Pasar Senggol no Fomentu II.
Nia esplika katak termu aseitasaun ne’e nia objetivu mak haree filafali ba dokumentu sira no kustu ba indeminizasaun nian ne’ebé iha parte vítima ho Governu halo konkordánsia.
“Karik halo tiha indemnizasaun mak tempu ruma vítima rasik ka ema seluk mai halo reklamasaun maka termu aseitasaun ne’e mak sai prova ida. Semana kotuk ami atende ona komunidade husi Pasar Senggol hamutuk uma-kain 88 mak mai asina ona termu aseitasaun no semana ne’e ami atende fali ba komunidade husi Fomentu II hamutuk uma-kain 100-resin”, Samuel Soares hateten.
Nia dehan totál komunidade ne’ebé afeta ba despezu administrativu iha Bidau Senggol hamutuk uma-kain 92 no Fomentu II 266.
Nia esplika katak bainhira vítima afetadu sira asina hotu ona termu aseitasaun, parte Diresaun Nasionál Planeamentu, Peskiza no Dezenvolvimentu sei haruka ba MOP verifika halo di’ak mak Ministériu Finansa halo transferénsia osan ba sira-nia konta bankária.
“Ami nafatin husu ba komunidade afetadu sira seluk ne’ebé seidauk hatama dokumentu no seidauk mai asina termu aseitasaun favór hakbesik mai, halo tuir kritériu sira ne’ebé iha, nune’e imi bele hetan imi-nia direitu”, nia aviza.
Kona-ba komunidade afetada husi Bidau Santa-Ana no Bebonuk seidauk bele halo pagamentu, tanba parte Diresaun Nasionál Planemanetu, Peskiza no Dezenvolvimentu sei elabora hela sira-nia dadus.
Samuel hateten kona-ba orsamentu ba indemnizasaun no alargamentu estrada nian MOP prevee, kada tinan, millaun $2. “Tuir dadus ita foti katak halo indemnizasaun ba vítima despezu administrativu hahú husi montante $500 to’o rihun $68”, nia adianta.
Iha fatin hanesan, vítima ba despezu administrativa iha Pasar Senggol-Bidau, Venâncio Soares dos Santos, triste iha momentu Governu foti desizaun halo despezu ba sira, maibé hakarak dezenvolvimentu la’o tenke koopera.
“Agradese tebes ba Governu tanba hanoin dezenvolvimentu la’o, maibé Governu mós la haluha nia responsabilidade. Sempre rekoñese obra sira ne’ebé nia povu halo”, nia dehan.
Nia salienta katak ba termu aseitasaun ne’ebé nia parte ho MOP asina ne’e haree liubá kondiasaun konstrusaun fízika uma ka fatin negósiu ruma ne’ebé sira sobu, kustu estimativa ba indeminizasaun nian, inklui verifika dokumentu.
“Husi termu aseitasaun, ba ha’u rasik iha momentu ne’ebá loke salon tesi-fuuk no konstrui fatin fase karreta, motór, entaun ohin ha’u hetan estimativa ne’ebé Governu tau hamutuk rihun $30. Ida-ne’e ha’u agradese tebes basá uitoan ka barak Governu rekoñese ha’u-nia obra”, nia realsa.
Notísia relevante: MOP prevee millaun $2 hodi indemniza vítima despezu administrativu no alargamentu estrada
Jornalista: Arminda Fonseca
Editora: Maria Auxiliadora
