DILI, 22 Janeiru 2025 (TATOLI) – Ministériu Obra Públika (MOP) aloka, iha tinan ne’e, millaun $2 hodi halo indemnizasaun ba vítima afetadu ba despeju administrativa no alargamentu ba estrada.
Ministru Obra Públika, Samuel Marçal, hateten kona-ba despeju administrativa ne’ebé liderada husi Sekretaria Estadu Asuntu Toponímia no Organizasaun Urbana halo, iha tinan ne’e, liuliu iha Fomentu II, Bebonuk no Becora ba alargamentu estrada, daudaun parte Diresaun Nasionál Planeamentu, Peskiza no Dezenvolvimentu rekolla ona vítima sira-nia konta bankária, nune’e bainhira hotu sei halo pagamentu.
“Osan ba despeju administrativa ne’e mak tama ona millaun 2$ ne’e, maibé ita hotu hatene orsamentu foin hahú ezekuta iha semana kotuk. Agora, sei ajusta ba sistema sira no ekipa rekolla ona konta bankária husi vítima afetada sira. Ita haree balun ne’ebé iha ona sei prosesa atu hahú pagamentu”, Samuel Marçal informa iha Palásiu Governu, ohin.
Vítima ba despeju administrativu husi Fomentu II, Bebonuk inklui alargamentu ba estrada iha Kulu-Hun no Bekora ne’e hamutuk uma-kain 400-resin.
“Pagamentu ne’ebé ita halo haree tuir kategoria uma, hahú husi permanente, semi-permanente no temporári. Osan [selu] hahú husi rihun $3 to’o $100. Ha’u hateten ba komunidade afetada ba despeju administrativu katak ohin imi triste, tanis, maibé ita hotu hadomi rai ne’e, ha’u fiar iha loron ida imi sei sente katak imi mós kontribui ba dezenvolvimentu ba ita-nia rai”, Samuel Marçal haktuir.
Nia hatutan katak Governu hasai populasaun sira husi fatin risku, tanba hadomi sira no hasai sira ne’e la husik leet de’it, maibé sei rekopera saida mak sira gasta ona.
Lembra katak Primeiru-Ministru, Xanana Gusmão, informa antes ona katak komunidade iha Dili ne’ebé hetan despezu administrativu iha direitu atu hetan indemnizasaun husi Governu.
“Hotu-hotu hetan, laiha ema ida la hetan indemnizasaun. Rekolla ona sira-nia konta bankária, laiha ida dehan duni de’it ne’e laiha”, Xanana hateten foin lalais ne’e iha Palásiu Prezidensiál Dili.
Notísia relevante: PM Xanana: Komunidade ne’ebé hetan eviksaun iha direitu hetan indemnizasaun
Jornalista: Arminda Fonseca
Editora: Maria Auxiliadora
