BAUCAU, 22 agostu 2022 (TATOLI) – Agrikultór na’in-50 hosi munisípiu haat tuir formasaun viveiru fini produtu ortikultura hosi Sentru Dezenvolvimentu Komunitária (CDC, sigla portuges) Baucau.
Diretór CDC, Vicente Matos Belo, esplika, formandu na’in-50 kompostu munisípiu haat hanesan suku Cairui, Manatuto na’in-10, suku Homen, Lautém na’in-10, suku Wabubu Viqueque na’in-10 no Baucau hosi suku hanesan Atelari no Uma Ana-Ulo na’in-20.
“Ita-nia esperansa mak sira bele dezenvolve tékniku ne’ebé hetan iha formasaun no bele serbbisu no loke kampu serbisu iha sira-nia suku, liuliu fó oportunidade joven,” Diretór CDC informa ba Agência Tatoli iha Triloka, segunda ne’e.
Matéria iha formasaun ne’e mak hanesan jestaun ba rai, fila-rai no prepara kanteiru.
Faze daruak preparasaun fini hanesan halo viveiru, liuliu esplora ideia no tékniku inklui inovasaun, dalatoluk mak kuda hanesan preparasaun média utiliza ba potri nu’udar instrumentu modernu no tradisionál hanesan utiliza materia lokal hudi tahan ne’ebé fasil atu hetan.
Nune’e mós aprende kona-ba merkadoria liuliu oportunidade merkadu nune’e bele kuda ho kuantidade hodi responde ba merkadu no matéria seluk kona-ba postu kolleta no analiza kustu kalkulasaun kona-ba gastu orsamentu no lukru tuir medida área agrikultura.
“Sira hakarak sai agrikultór ne’ebé di’ak empregu iha setór agrikultura entaun tenke prepara-aan, investe enérjia no fundu nune’e fó benefisiu ba grupu, individu no familia,” Vicente Matos Belo akresenta.
Formasaun refere apoia hosi GIZ liuhosi programa ai ba futuru ne’ebé hala’o durante durante loron-30 kompostu formasaun loron-15 no implementasaun iha kada suku loron-15.
CDC sei apoia fini hanesan produtu ortikultura ekipamentu agrikultér no orsamentu kada ema $95 hodi motiva nu’udar investimentu iha setór agrikultura.
Jornalista: Natalino Belo
Editór: Evaristo Soares Martins
