DILI, 18 janeiru 2023 (TATOLI)– Komisaun interministeriál sei halo aprezentasaun, iha kinta ne’e, kona-ba reajustamentu ba Planu Estratéjiku Dezenvolvimentu (PED) tinan 2011-2030, iha Parlamentu Nasionál.
“Aban ha’u sei aprezenta ba Parlamentu Nasionál hanesan ha’u aprezenta ba Governu. Iha Parlamentu Nasionál halo aprezentasaun filafali dokumentu ne’ebé mak prepara ona no husu mós opiniaun hosi membru PN sira iha prosesu reajustamentu planu estratéjiku ne’e rasik”, Ministru Planu no Ordenamentu (MPO), José Maria dos Reis, hateten ba Agência TATOLI, iha Palásiu Governu.
Nia hatutan, progresu ba konsulta públika sei la’o nafatin, bazeia ba pilár ne’ebé define ona.
“Semana kotuk ami halo workshop ida ho pilár sira ne’ebé maka define iha reajustamentu PED foun ne’e. Diskusaun ne’e atubele enrikese de’it dokumentu ne’ebé komisaun prepara tiha ona, liuliu atubele enkuadra iha kuadru rezultadu ne’ebé ita hakarak atu atinje iha tinan opersionál (kada tinan-lima)”, nia esplika.
Konsulta públika ho entidade sira seidauk ramata, iha ekipa ténika ho ministériu mak hala’o ida ne’e no opiniaun balun sei la’o nafatin. Diskusaun ho ekipa refere bainhira hotu mak sei reaprezenta iha komisaun interministeriál no aprezenta mós iha Konsellu Ministru.
Antes ne’e ministru esplika katak reajustamentu PED 2011-2030 ne’e tanba durante ne’e foin mak atinje meta 53 husi meta 200.
Reajustamentu ne’e halo tanba implementasaun tinan-10 ona, 2011 to’o 2022, no agora atu tama ba 2023. Iha dokumentu PED ne’e rasik mós define prazu tolu, dahuluk mak kurtu prazu ne’ebé lori tinan lima (2011-2015), faze daruak 2015-2020, agora tama ona ba faze datoluk (2020-2030).
Tanba ne’e, prioridade tebes VIII Governu foti planu ordenamentu estratéjiku atu halo reajustamentu tanba tinan 10 implementa PED, maibé povu sei halerik ba infraestrutura bázika hanesan problema bee-moos, estrada, no problema oioin.
Notísia relevante : https://tatoli.tl/2022/06/20/governu-halo-reajustamentu-ped-2011-2030-hodi-re-define-metas/
Jornalista: Antónia Gusmão
Editora: Maria Auxiliadora
