VIQUEQUE, 17 abríl 2023 (TATOLI)—Munisípiu Viqueque benefisia projetu komunitáriu dada eletrifikasaun hamutuk neen hosi Eletricidade de Timor Leste, Empreza Públika (EDTL, E.P).
Supervizór EDTL, E.P munisípiu Viqueque, Ernesto Sarmento, relata, hosi projetu neen ne’e, daudaun tolu la’o ona, enkuantu projetu tolu seluk sei iha prosesu nia laran maibé tempu badak hahú halo distribuisaun materiál ba fatin implementasaun projetu tolu.
“Daudaun ne’e projetu tolu la’o ona, hanesan dada ahi eletridade bá Uelu-Tasi, Uefia, suku Bahalara Uain kuaze kilómetru 3 resin, iha postu Viqueque Vila ho totál benefisiáriu uma-kain 15, Weluli manas purvolta kilómetru 7 resin, suku Uaimori, postu Viqueque Vila ba benefisiáriu uma-kain 96. Empreza sira halo maibé la hotu tanba ninia alvu liu Bill of Quantity empreza nian, tanba ne’e ami implementa projetu komunitáriu atu abitante sira bele asesu mós ahi eletrisidade,” Ernesto Sarmento informa ba Agência Tatoli, iha postu Viqueque Vila, segunda ne’e.
Notísia relevante : Postu saúde Uluso enfrenta problema eletrisidade no bee moos
Aleinde ne’e, progresu implementasaun dada eletrisidade ba Uaimori daudaun ne’e atinje ona 65%, enkuantu Ueluli no Uefia atinje 45%.
“Iha fulan ida-ne’e ami seidauk bele finaliza projetu tolu ne’e tanba sei hein materiál balun hosi armazen nasionál. Ami hakarak finaliza lalais maibé ami sempre hasoru obstáklu seluk hanesan udan, ne’ebé ho kondisaun dalan asesu ba terrenu difikulta ami maibé sei kontinua esforsu hodi finaliza projetu sira ne’e,”nia akresenta.
Nia dehan, projetu foun tolu ne’e sei implementa iha suku Uma-Uain Leten, postu Viqueque Vila ba área Samari Tuan hosi liña média tensaun kuaze kilómetru neen no sei benefisia ba uma-kain 30, iha suku Uaitame bá área Uailalika ho totál benefisiáriu hamutuk 55, hosi Uaitogu suku Afaloikai ba Lebadae no Loko-Loko ho totál benefisiáriu uma-kain 71 hosi postu Uatulari.
“Ami halo ona akizisaun sasán ba projetu foun tolu ne’e, agora hein orden materiál. Ami mós konfirma katak iha tempu badak nia laran ami hahú implementasaun projetu komunitáriu tolu,” nia hato’o.
Jornalista : Vitorino Lopes da Costa
Editora : Julia Chatarina
