Atauru, 19 abríl 2023 (TATOLI)– Sekretariadu Tékniku Eleisaun Administrativa (STAE) munisípiu Ataúro atualiza ona kartaun eleitorál sidadaun Atáuru ne’ebé hela iha Dili hamutuk 4.023 ba prosesu renovasaun hodi bele hola parte iha elisaun parlamentár.
Diretór STAE munisípiu Ataúro, Eliapa Da Costa hatete, renovasaun ba kartaun eleitorál sira ne’e atu bele asegura sidadaun Ataúru hela iha Dili, bele partisipa iha elisaun parlamentár ne’ebé sei realiza iha loron 21 fulan Maiu tinan 2023.
“Ami hala’o ona atendimentu hodi atualiza kartaun eleitorál hahú kedan iha establesementu eskritóriu no resenseamentu eleitorál iha loron 11 fulan Juñu tinan 2022 to iha loron 31 Marsu tinan 2023. Too oras nee STAE atualiza ona kartaun eleitorál hamutuk 4.023 ba sidadaun sira ne’ebé hela iha Munisípiu Dili, inklui mós sira ne’ebé kartaun lakon, tohar, no mós sira ne’ebé mak idade tama ona ba 16,” Diretór STAE munisípiu Ataúro, Eliapa Da Costa informa ba jornalista TATOLI, kuarta feira nee.
Diretór ne’e hatutan, STAE sei kontinua fornese atendementu iha segundu períodu durante loron 15 hahú husi abríl loron 22 to’o loron 6 fulan maiu, molok tama iha eleisaun parlamentár.
Aleinde ne’e hatan kona-ba preparasaun, STAE Munisípiu Ataúro nia preparasaun ba Eleisaun Parlamentár tinan 2023, Diretór Eliapa hateten, STAE halo ona identifikasaun ba sentru votasaun sira no halo mós rekrutamentu ba pesóal brigada sira hodi prepara ba eleisaun ne’ebé sei mai.
“STAE Ataúro identifika ona sentru votasaun hamutuk 15 no Estasaun votasaun hamutuk 22 iha munisípiu Ataúro. STAE mós halo ona rekrutamentu ba pesoál brigadista hamutuk 15 bazeia ba sentru votasaun ne’ebé iha ona, no pesoál brigadista sira ne’e mós, simu ona formasaun hosi STAE kona-ba, preparasaun ba votasaun parlamentár,”nia hateten.
Entretantu tuir nia, daudaun ne’e STAE koordena hela ho Autoridade Administrasaun Munisípiu hodi haree kona-ba armazenamentu no fatin apuramentu Munisipál ba eleisaun parlamentár 2023.
Jornalita: José Belarmino De Sá
Editora: Nelia Borges
