MALIANA, 08 maiu 2023 (TATOLI) – Diretór Komisaun Nasionál Eleisaun (CNE, sigla portugés) munisípiu Bobonaro, Juvito Ramos, husu ofisiál eleitorál na’in-1,700 ne’ebé selesionada hosi Sekretariadu Tékniku Administrasaun Eleitorál (STAE) atu serbisu ho neutru no imparsiál iha eleisaun parlamentár 21 maiu 2023.
Tuir nia, papél ofisiál eleitorál importante tebes iha prosesu eleisaun la’o to’o kontajen votu maske knaar ne’ebé atribui loron ida de’it.
Notísia relevante: CNE Bobonaro observa líder polítiku sira evita ona insulta malu
“Iha loron 21 fulan maiu saida mak imi presiza halo, primeiru imi tenke hatudu imi-nia neutrál no hala’o serbisu tenke tranparánsia no imparsiál, imi labele hanoin katak imi-nia serbisu loron de’it ne’ebé naran halo servisu de’it la halo di’ak,” nia hateten iha Maliana
Nia dehan, antes ne’e ema barak mak konkorre iha vaga refere, maibé na’in-1,700 mak selesionadu hosi STAE, tanba ne’e husu ba ofisiál eleitorál atu asume knaar ho responsabilidade.
“Labele dehan katak fó osan oituan de’it tenke karreta ha’u servisu, ha’u fó hanoin de’it eleisaun ida-ne’e la’ós ema estranjeiru nian, ne’e ita-nian, ne’ebé hanesan sidadaun Timoroan tenke iha sentidu nasionalizmu no patriotizmu, imi serbisu di’ak imi fó ona kontribuisaun boot ba rai ida-ne’e, tanba eleisaun ne’e ita atu hili membru Parlamentu no Governu atu halo dezenvolvimentu ba ita-nia rai,” nia dehan.
Enkauntu totál ofisiál eleitorál iha munisípiu Bobonaro na’in-1,700. Hosi númeru ne’e sei koloka kada estasaun votu na’in-10.
Entretantu totál eleitór elijível iha munisípiu Bobonaro atu vota iha eleisaun parlamentár na’in-72.537, komposta hosi Atabae 8.843 komposta hosi mane 4.951 no feto 3.892.
Balibo 11.827 iha mane 6.113 no feto 5.714, Bobonaro na’in-17.700 iha mane 8.753, feto 8.946. Cailaco na’in-7.873 iha mane 4.338 no feto 3.535.
Hosi parte Lolotoe na’in-5.388 iha mane 2.646, feto 2.742 no postu administrativu Maliana hamutuk na’in-20.906 komposta hosi mane 10.533 no feto 10.373.
Tuir dadus hosi STAE katak, totál sentru votasaun (CV, sigla portugés) iha munisípiu Bobonaro hamutuk 150 no estasaun votasaun (EV, sigla portugés) 170 mai hosi postu administrativu Atabae iha CV 14 no EV 16.
Balibo CV 22 no EV 26, Bobonaro CV 48 no EV 50, Cailaco iha CV 17 no EV 18, Lolotoe iha CV 17 no EV 18 no postu administrativu Maliana iha CV 34 no EV 42.
Notísia relevante: CNE Bobonaro husu afiliante sira ‘labele insulta partidu anteriór’
Jornalista: Sergio da Cruz
Editór: Evaristo Soares Martins
