COVALIMA, 10 jullu 2023 (TATOLI)–Organizasaun Noun Governamentál (ONG) Ba Futuru hala’o atividade jogu hodi anima labarik sira-ne’ebé sai vítima ba dezastre naturál iha suku Zulo postu administrativu Zumalai, munisípiu Covalima ho jogu.
Notísia Relevante: Governu entrega apoiu emerjénsia ba vítima dezastre naturál iha Zulo
“Ami hosi Organizasaun Noun Governamentál (ONG) Ba Futuru ne’ebé hetan apoiu hosi UNICEF Timor-Leste hodi hala’o atividade animasaun jogu ba labarik sira-ne’ebé sai vítima ba dezastre naturál akontese iha suku Zulo,” Koordenadór Programa Apoiu Saúde Mentál no Psikolojia, Helio Roberto Dias, informa ba Agência Tatoliiha suku Zulo, segunda ne’e.
ONG Ba Futuru hala’o atividade animasaun ba labarik sira ne’e atu projete labarik sira hosi trauma no tauk liga ho apoiu saúde mental ba labarik sira.
“Atividade ne’ebé ami halo mak oinsá fó animasaun ba labarik sira atu proteje hosi trauma no tauk liga ho apoiu saúde mental,” nia dehan.
Nia hateten, ONG Ba Futuru hala’o atividade halibur labarik sira oinsá halo sira hamnasa liuhosi kanta, espresa-sira aan kona-ba arte hanesan pinta, halimar bola hodi halo atividade ne’ebé bele halo sira kontente.
Durante hala’o atividade animasaun iha loron dahuluk ne’e, haree labarik sira sente tauk maibé bainhira bolu sira espresa sira-nia sentiment ne’e haree ba sentiment tauk ne’ehahú lakon..
“Programa animasaun haree ba psikolojia labarik nian hafoin akontese dezastre no toba iha lona okos ladún seguru, hanesan baibain bainhira ami to’o mai sira la besik no tauk, maibé ami bolu no halibur sira espresa sira-nia sentiment, nune’e halo sira-nia tauk ne’e komesa lakon, sira halimar no la hanoin kona-ba saida mak atu akontese,” nia hateten.
Entertantu, udan-boot ne’ebé akontese iha loron 3-4 fulan-jullu tinan 2023 lori tristeza ba komunidade tanba komunidade sai vítima hodi lakon hela fatin no seluk tán.
Durante akontese udan boot, komunidade suku Zulo akontese dezastre ho tipu rai halai maibé afetadu ba komunidade postu sira hanesan Postu Tilomar, Suai, Maucatar seidauk hetan apoiu emerjénsia maibé postu Zumalai hetan ona apoiu emerjénsia.
Tuir dadus, vítima Dezastre Naturál hosi postu Zumalai iha aldeia Lale, Obukmil no Leogol ho nia xefe família hamutuk 162 no hosi númeru ne’e uma 54 mak tama ba kategória aat totál.
Jornalista : Celestina Teles
Editór : Cancio Ximenes
