DILI, (TATOLI) – Institutu Nasionál ba Administrasaun Públika (INAP) define ona kategoria haat ba nivel formasaun lideransa iha funsionalizmu públiku ba futuru.
Diretór Jerál INAP, Agostinho Letencio de Deus, hatete kategoria dahuluk maka lideransa bázika sei oferese de’it ba kargu xefia no seksaun sira, tuir ba lideransa médiu ba diretór nasionál, kategoria seniór ba diretór jerál no da haat nia maka formasaun ba lideransa ezekutivu.
“En-prinsípiu kuandu ninia preparasaun remata ona iha primeiru no segundu trimestre entaun iha terseiru no kuartu trimestre iha bele komesa”, dehan nia ba TATOLI iha Ministériu Finansa Ai-tarak Laran, ohin.
Ho formasaun ne’e ninia finalidade ida maka sei kontribui ba efisiénsia no efikásia ba lideransa atu jere rekursu umanu, liuliu funsionáriu públiku iha administrasaun públika.
“Ami espera depois formasaun bele halo mudansa no inovasaun iha kada instituisaun ida-ida”, diretór ne’e realsa tan.
INAP prepara ona matéria sira hanesan lideransa, matéria hanoin lójika, jestaun finansa, jestaun ba aan rasik.
“Totál (formandu) ne’e ami sei koordena ho komisaun funsaun públika atu hatene ema na’in hira maka asume kargu xefia iha diresaun hotu”, tenik tan.
Entretantu INAP oras ne’e iha ona faze preparasaun ba módulu, kurríkulu no rejime sira importante ba prosedimentu sira inklui rekolla hanoin hosi peritu nasionál no internasionál inklui diretór nasionál sira atu kompleta kurríkulu ba formasaun lideransa.
Jornalista: Agapito dos Santos
Editora: Rita Almeida
