Aprovasaun Rejime Jerál Sistema Finanseiru permite Governu harii BNDTL
DILI, 08 Jullu 2026 (TATOLI)-Prezidente Komisaun C iha Parlamentu Nasionál, ne’ebé trata Asuntu Finansa Públika, Cedelízia Faria dos Santos, hateten bainhira proposta-lei númeru 22/VI(2a) kona-ba Rejime Jerál Sistema Finanseiru no Atividade Bankária hetan ona aprovasaun no promulgasaun sei fó oportunidade ba Governu halo prosesu tomak hodi estabelese Banku Nasionál Dezenvolvimentu Timor-Leste (BNDTL).
Tuir nia, maski Governu rasik aprova ona dekretu-lei ba harii banku referidu, implementasaun ne’e sei presiza tan baze legál ida. Tanba ne’e, aprovasaun lei ne’e sai etapa importante atu Governu bele kontinua ho prosesu estabelesimentu banku ne’e.
“Lei ne’e bainhira aprova, tama iha vigór bele fó oportunidade ba Governu halo ona prosesu tomak harii Banku Dezenvolvimentu Nasionál ne’ebé iha ona Programa Nonu Governu no prevee ona nia verba iha Orsamentu Jerál Estadu 2026”, deputada hateten hafoin reuniaun Komisaun iha Parlamentu, ohin.
Komisaun C ohin mós aprova ona relatóriu diskusaun espesialidade ba proposta lei ne’e no sei submete ba meza Parlamentu hodi ajenda ba diskusaun no aprovasaun finál globál iha plenária.
Cedelízia esplika katak proposta lei ne’e importante tanba durante ne’e Timor-Leste uza de’it regulamentu husi UNTAET atu regula sitema finanseiru no atividade bankária. Proposta lei foun ne’e regula asuntu importante, inklui prevensaun brankeamentu kapitál, kombate osan falsu, organizasaun sistema banku sira, kapitál mínimu atu harii banku, ne’ebé determina montante mínimu millaun $25.
Notísia relevante: BNDTL sei la kompete ho banku komersiál sira
“Tanba, sistema ida atu implementa loloos lei ne’e tinan ida depois, só Banku Nasionál Dezenvolvimentu Nasionál [banku foun] ne’e mak nia imediata”, katak.
Nia mós husu Banku Sentrál Timor-Leste (BCTL) atu prepara implementasaun lei ne’e ho prodesimentu sira, formasaun ba rekursu umanu, kriasaun órgaun kontrolu foun tuir lei prevee atu hala’o serbisu ho di’ak liután.
Notísia relevante: Komisaun C diskute proposta Lei Rejime Jerál Sistema Finanseiru
Jornalista: Nelson de Sousa
Editora: Maria Auxiliadora
