DILI, 11 outubru 2023 (TATOLI) – Ekipa Brigada Xineza na’in-12 konklui ona misaun iha Hospitál Nasionál Guido Valadares tanba fó ona kontribuisaun liuhosi tratamentu ba timoroan sira durante tinan rua iha ospitál.
Reprezentante ekipa Brigada Xineza Liuyabin, hateten iha tinan rua liubá médiku xineza sira fó kontribuisaun ida signifikante tebes ba timoroan sira liuhosi tratamentu saúde ne’ebé mak sira oferese.
“Sira oferese tratamentu saúde gratuita tuir sira-nia espesialidade iha Hospitál Nasionál Guido Valadares (HNGV)”, Liuyabin informa bainhira halo serimónia despedida iha salaun enkontru HNGV, ohin.
Nia agradese ba Governu Timor-Leste liuhosi Ministériu Saúde ba sira-nia apoiu durante misaun iha Timor-Leste.
“Ami-nia agradese wain ba Governu Timor-Leste no Ministériu Saúde ba sira-nia apoiu durante ami-nia misaun iha Timor-Leste no bazeia ba kooperasaun entre Timor-Leste ho Xina, médiku xineza foun balun sei mai fali TL iha semana oin hodi kontinua fó asisténsia médika ba timoroan sira”, nia informa.
Iha fatin hanesan, Diretór Klíniku iha HNGV, Marcelino Correia, dehan ospitál halo despedida ba medika Xineza hamutuk 12 ne’ebé mak ramata ona sira misaun iha Timor-Leste.
“Ohin ita halo despedida ba ekipa Brigada médika Xina ne’ebé mak durante tinan rua apoiu Hospitál Nasionál Guido Valadares hodi halo atendimentu ba pasiente sira iha departamentu radiolojia, sirurjiaun, obsteretia, kardiolojia no ortopedia”, Marcelino Correia dehan.
Nia esplika, durante tinan rua médiku sira apoiu tebes liuhosi sira nia servisu maske ospitál iha difikuldade maibé sira pronto apoiu.
“Sira mós apoiu ita iha ekipamentu sira hanesan Ct scan, MRI, inklui mákina tiru fatuk iha rins ne’e, depois sira mós hanorin médiku sira oinsá atu uza ekipamentu sira ne’e, entaun ha’u-nia haree sira-ne’e apoiu tebes ba ita”, nia afirma.
Vise Ministru ba Operalizasaun Ospitál, Flavio Brandao, hateten kooperasaun entre médiku Xineza sira ne’e liuhosi embaixada Xina iha Timor-Leste ne’ebé lao kelur ona.
“Ita-nian, regularmente tinan rua sira-nia médiku espesialista tenke remata sira-nia misaun iha HNGV, entaun ida-ne’e ita-nia despedida ba sira no semana oin sira-nia maluk mai fali ona iha ita-nia rain”, Flavio Brandao adianta.
Vise Brandão haktuir, ekipa médika xineza ida-ne’e, sira-nia servisu di’ak tebes ho profisionalismu no sira-nia kooperasaun di’ak ho médiku timoroan sira iha ospitál.
“Sira mós partisipa atividade tratamentu ba komunidade iha munisípiu sira, entaun ita agradese ba sira-nia kooperasaun no fiar katak semana oin, ita-nia ekipa sira foun mai fila fali”, nia konklui.
Jornalista : Felicidade Ximenes
Editór : Zezito Silva
