DILI, 11 Juñu 2026 (TATOLI)–Ministériu Defeza, Kontra Almirante Donaciano do Rosário Gomes ‘Pedro Klamar Fuik’ simu audiénsia husi Reprezentante Ministériu Defeza Nova Zelándia no atuál Embaixadora Nova Zelándia iha Timor -Leste, Helen Tunnah, Kinta ne’e, hodi asina akordu kooperasaun bilaterál iha área defeza nune’e bele haforsa dezenvolvimentu no kapasitasaun FALINTIL-Forsa Defeza Timor-Leste (F-FDTL).
Ministru Klamar Fuik esplika, akordu ne’e liga liu ba instrumentu jurídiku iha domíniu defeza ne’ebé sei foka ba reforsa kapasidade F-FDTL no fó biban ba militár rai rua ne’e hametin kooperasaun.
“Akordu ida-ne’e ita estabelese hodi halo atividade hotu ne’ebé relasiona ho dezenvolvimentu forsa, apoiu iha área formasaun, área treinu, área hotu ne’ebé mak Timor-Leste presiza atubele dezenvolve Forsa Armada Timor-Leste,” Ministru hato’o ba Jornalista sira hafoin hasoru malu ho Embaixadora Helen Tunnah iha Gabinete Ministériu Defeza, Fatuhada.
Notísia relevante : Nova Zelándia no Timor-Leste diskute vizaun ASEAN iha dezenvolvimentu ekonómiku
Aleinde ne’e, akordu ne’e atubele fó kapasidade ba dezenvolvimentu Forsa Armada Timor-Leste, nune’e mós apoiu sira seluk ne’ebé mak Nova Zelándia fó mai Timor-Leste dezde uluk to’o agora.
“Nova Zelándia sai parseiru di’ak ba Timor-Leste dezde 1999, ida-ne’e istóriku no Nova Zelándia parseiru ida-ne’ebé amigável tebes, ho konfiansa no kontribui ba dezenvolvimentu, seguransa rejionál no seguransa iha fatin hotu,” nia akresenta.
Nota mós katak iha atividade barak ne’ebé mak realiza ona iha área defeza dezde tinan 1999 to’o agora, kooperasaun bilaterál entre rai rua iha domíniu defeza ne’e foku ba instrumentu jurídiku no reflete ba polítika kooperasaun Timor-Leste.
“Ita realiza ona atividade barak, agora ita asina akordu hanesan revizaun ba akordu hotu ne’ebé mak iha. Depois Timor-Leste tama ASEAN primeiru ita halo akordu ho Malázia, segundu Nova Zelándia iha domíniu defeza,” nia subliña.
Iha fatin hanesan, Embaixadora Nova Zelándia mai Timor-Leste, Helen Tunnah, hateten, Nova Zelándia sente kontente ba inisiativa ne’e no nasaun rua ne’e iha istória ne’ebé mak forte no orgullu iha área defeza.
“Ami hamutuk ho Timor-Leste iha 1999 no to’o agora ita sei nafatin hamutuk no asina akordu ida-ne’e permite ami-nia kolaborasaun atu sai kle’an liután hodi apoiu prioridade sira ne’ebé nasaun rua hamutuk determina no konkorda ona,” nia tenik.
Jornalista : Natalino Costa
Editora : Julia Chatarina
