DILI, 19 Fevereiru 2026 (TATOLI)—Embaixadora Nova Zelándia ba ASEAN, Joanna Jane Anderson, akompaña husi Embaixadora Nova Zelándia ba Timor-Leste, Helen Tunnah, hala’o enkontru ho Primeiru-Ministru, Kay Rala Xanana Gusmão, hodi diskute kona-ba vizaun Timor-Leste ba ASEAN iha área dezenvolvimentu ekonómiku.
“Tanba ne’e, ami hakarak mai Timor-Leste no vizita ho Primeiru Ministru no rona husi nia kona-ba ASEAN no Timor-Leste nia vizaun sira ba ASEAN, maibé mós kona-ba oinsá Nova Zelándia, hanesan parseria Timor-Leste nian, bele servisu hamutuk iha asuntu importante ba nasaun rua,” Embaixadora Nova Zelándia ba ASEAN, Joanna Jane Anderson, hateten ba jornalista sira iha Palásiu Governu, ohin.
Nia hatutan, pontu importante liu iha diskusaun ne’e mak sira sempre sai parseria hodi partilla programa prioridade hanesan dezenvolvimentu ekonómiku, kuidadu Timor-Leste nia planeta, ligasaun ema ba ema, inklui prosperidade tanba dezenvolvimentu ekonómiku importante tebes ba kooperasaun nasaun rua nian.
“Ami koñese kona-ba asuntu haat ne’e, nune’e Primeiru-Ministru mós valoriza relasaun Timor-Leste ho Nova Zelándia no hein katak servisu ne’e sei besik liután iha futuru oin mai,” nia dehan.
Jornalista : Alexandra da Costa
Editór : Cancio Ximenes
