VIQUEQUE, 08 novembru 2023 (TATOLI)—Juventude munisípiu Viqueque, kuarta ne’e, realiza espozisaun ba negosiante sira, iha ámbitu selebrasaun Masakre Santa Cruz ba dala-32, iha kampu futeból Beloi, postu Viqueque Vila.
Atividade ne’e ho tema ‘espíritu 12 novembru promove kreatividade no pensamentu krítiku foin-sa’e hodi harii sosiedade kontribuente no enkluzivu’. Expozisaun ne’e ho objetivu atu promove ezemplu luta juventude loriku asu’wa’in hametin unidade liuhosi kreatividade no inovativu iha era meleniál.
Administradór munisípiu Viqueque, Januário Soares ‘Bolly’, hateten, espozisaun ne’e atu hatudu pozisaun ukun rasik-an ba tinan 20 resin hodi hadi’a rai Timor-Leste no hatudu katak joven sira nu’udar kontinuadór.
“Ohin loron funu hotu ona, ita ukun-an tinan 20 resin ona, agora ita luta ba dezenvolvimentu. Ho nune’e, liuhosi espozisaun ida-ne’e, ita bele hatudu sai maka durante ne’e Viqueque halo iha faze ukun rasik-an. Liuhosi espozisaun ida-ne’e Viqueque-oan bele partisipa másimu hodi hatudu ida-idak ninia produtividade, nune’e bele promove mós produtu hosi munisípiu Viqueque,” Administradór dehan hafoin halo abertura iha espozisaun, iha kampu futeból, Beloi.
Notísia relevante : Munisípiu Viqueque realiza espozisaun produtu lokál
Ho nune’e, Autoridade munisípiu Viqueque enkoraja joven sira hodi hatudu ida-idak ninia produtu lokál no talentu kreatividade artezanatu hodi partisipa iha expozisaun ida-ne’e.
“Ita to’o iha ukun rasik ne’e liuhosi prosesu naruk no ita sira-ne’ebé sei moris buka kompriende istória sira pasadu hodi ita hakat ba oin,” nia hato’o.
Iha fatin hanesan, Prezidente Komisaun Organizadora, Raul Pereira, hateten, inisitiva ne’e hodi fó oportunidade ba joven kreatividade sira hodi hatudu talentu liuhosi arte.
Espozisaun ne’e realiza durante fulan-ida, hahú hosi loron 07 novenbru to’o 07 dezembru, ne’ebé Komisaun organizadora prepara barraka hamutuk 40 hodi oferese ba grupu sira fa’an produtu lokál, tais, artezanatu no seluk tan. Enventu ne’e hetan apoia hosi empreza sira iha munisípiu Viqueuque hamutuk $2.000 resin.
Abertura serimónia ne’e partisipa hosi autoridade lokál, komadante Polísia Nasionál Timor-Leste (PNTL) munisípiu Viqueque, Diretór munisipál, diretór liña ministeriál, Prezidente Kámara Komersiu Indústria Viqueque inklui joven sira.
Jornalista : Vitorino Lopes da Costa
Editora : Julia Chatarina
