DILI, 22 novembru 2023 (TATOLI) – Estudante rihun-resin husi Eskola Bázika Filiál (EBF) 1,2 siklu Fatuhada hala’o fali prosesu aprendizajen iha edifísiu Ensinu Pré-Eskolár (EPE) Buras Kadalak Fatuhada ne’ebé falta kondisaun tanba daudaun sira-nian eskola iha hela prosesu konstrusaun.
Maski eskola ne’e nia kakuluk naksobu hotu ona no bainhira udan bele tama, maibé dirijente eskola nian tenke transfere alunu sira ba EPE Buras Kadalak refere, nune’e sira labele lakon direitu ba prosesu aprendizajen loroloron nian.
Koordenadora EPE Buras Kadalak, Santina da Costa, hatete edifísiu ne’e patrimóniu Estadu nian no Ministériu Edukasaun iha kompeténsia tomak atu uza iha tempu saida de’it. Bainhira EBF Fatuhada hasoru dezafiu boot tanba sira-nian edifisiu iha hela konstrusaun no laiha fatin atu hanorin estudante sira, ministériu deside hodi lori alunu sira utiliza EPE Buras Kadalak.
“Ami iha edifísiu foun ida ho sala aula haat maka foin konstrui. Ami iha tan sala aula neen ho edifísiu rua maka rezerva, maibé ho kondisaun grave. Husi sala sira seidauk hadi’a ne’e maka ami apoia ba EBF Fatuhada hodi koloka sira-nian estudante atubele tuir prosesu aprendizajen”, dehan.
Entre ensinu rua ne’e laiha problema, tanba estudante EPE Buras na’in-93 kontinua sira-nian aprendizajen iha edifísiu foun no alunu EBF Fatuhada uza sala ne’ebé oferese ona. “Tanba ne’e, presiza de’it maka hadi’a tan kondisaun eskola nian, nune’e labarik sira bele tuir prosesu aprendizajen ho di’ak”, afirma.
Ba kestaun ne’e, Ministériu Edukasaun, liuhusi Diresaun Nasionál Asaun Sosiál Eskolár apoia ona materiál emerjensia hodi reabilita edifísiu EPE Buras Kadalak ne’ebé nia kondisaun ladi’ak atu alunu rihun-resin husi EBF Fatuhada bele tuir aula ho di’ak.
Diretór Nasionál Asaun Sosiál Eskolár, Joaquim Martins, hatete ministériu iha obrigasaun atu tulun materiál emerjénsia ba eskola refere ba prosesu aprendizajen estudante sira-nian.
“EPE Buras Kadalak ne’e ninia kondisaun grave tebes. Kakuluk eskola sira naksobu hotu ona, bainhira iha tempu udan bele fó riksu ba estudante sira. Tanba ne’e presiza hadi’ak atubele tulun estudante sira iha prosesu estudu nia laran”, afirma.
Materiál emerjénsia ne’ebé apoia hodi hadi’a fali edifísiu ida ho sala aula haat ne’e mak hanesan kalén tahan 375, pregu kilo 10 inklui kalén lizu hodi taka iha uma kakuluk hamutuk metru 50.
“Tipu apoiu ne’ebé fornese iha loron 18 ne’e kategória emerjénsia, signifika ministériu ajuda de’it materiál, maibé laiha mão de obra katak serbisu atu konstrui hikas edifísiu EPE Buras Kadalak ne’e presiza envolve conselho dos país sira”, realsa.
Jornalista: Tomé Amado
Editora: Maria Auxiliadora
